టీ-హబ్‌కు నేషనల్ టెక్నాలజీ అవార్డు

తెలంగాణ ప్రభుత్వం నేతృత్వంలో నిర్వహిస్తున్న టీ-హబ్ ప్రతిష్టాత్మక జాతీయ అవార్డును గెలుచుకున్నది. టెక్నాలజీ బిజినెస్ ఇంక్యుబేషన్ విభాగంలో నేషనల్ టెక్నాలజీ అవార్డు-2023ను కేంద్ర ప్రభుత్వం టీ-హబ్‌కు అందించింది. ఢిల్లీలోని ప్రగతి మైదాన్‌లో జరుగుతున్న నేషనల్ టెక్నాలజీ వీక్ ఎక్స్‌పోలో భాగంగా నిర్వహించిన కార్యక్రమంలో.. టీ-హబ్ ప్రతినిధులకు కేంద్ర సైన్స్ అండ్ టెక్నాలజీ మంత్రి డాక్టర్ జితేంద్ర సింగ్ ఈ అవార్డును అందించారు. టీ-హబ్‌కు ఈ ప్రతిష్టాత్మక అవార్డు లభించడంపై తెలంగాణ ఐటీ మంత్రి కేటీఆర్ అభినందనలు తెలిపారు. దేశంలో బెస్ట్ టెక్నాలజీ ఇంక్యుబేటర్‌గా టీ-హబ్‌ను కేంద్రం ప్రభుత్వం గుర్తించిందని కేటీఆర్ ట్విట్టర్‌లో పేర్కొన్నారు. టీమ్ టీ-హబ్‌కు నా అభినందనలని కేటీఆర్ చెప్పారు.

రాష్ట్రం ఏర్పడిన తర్వాత 2015లో గచ్చిబౌలిలోని ట్రిపుల్ ఐటీ ప్రాంగణంలో 70వేల చదరపు అడుగుల విస్తీర్ణంలో టీ-హబ్‌ను తెలంగాణ ప్రభుత్వం ప్రారంభించింది. మొదటి దశ విజయవంతం కావడంతో ప్రభుత్వం రెండో దశను మరింత భారీగా చేపట్టింది. దాదాపు రూ.400 కోట్ల వ్యయంతో 3.70 లక్షల చదరపు అడుగుల విస్తీర్ణంలో టీ-హబ్ 2.0ను గత ఏడాది జూన్ 28న సీఎం కేసీఆర్ ప్రారంభించారు. రెండో దశలో ఏకంగా నాలుగు వేల స్టార్టప్‌లు తమ కార్యకలాపాలు సాగించేలా వసతులు కల్పించారు. రెండో దశ టీ-హబ్ ప్రపంచంలోనే అతిపెద్ద టెక్నాలజీ ఇంక్యుబేటర్‌గా రికార్డులకు ఎక్కింది.

స్టార్టప్‌ల కోసం ప్రత్యేక యంత్రాంగం..

దేశంలో స్టార్టప్‌ల కోసం ప్రత్యేక యంత్రాంగాన్ని ఏర్పాటు చేయాలని కేంద్ర ప్రభుత్వం భావిస్తున్నట్లు మంత్రి డాక్టర్ జితేంద్ర సింగ్ వెల్లడించారు. స్టార్టప్‌ల ప్రారంభం, వాటి అభివృద్ధిని ఈ యంత్రాంగం ఎప్పటికప్పుడు పర్యవేక్షిస్తుందని ఆయన చెప్పారు. ఇలాంటి యంత్రంగం ఉండటం ఇప్పుడు తప్పకుండా అవసరమని ఆయన పేర్కొన్నారు. ఒక ప్రత్యేక యంత్రాంగం ఉండటం వల్ల స్టార్టప్‌లకు అవసరమైన సాంకేతిక, ఆర్థిక తోడ్పాటును అందించేందుకు వీలుంటుందని కేంద్ర మంత్రి జితేంద్ర సింగ్ చెప్పారు.