నాయకులకు కండువాల పండగ.. నేతన్నలకు ఉపాధి పండగ

తెలంగాణ అసెంబ్లీ ఎన్నికలు ఈసారి చాలా ప్రత్యేకంగా మారాయి. గతంలో ఎన్నడూ లేనంతగా ఈసారి ఫిరాయింపులు జరుగుతున్నాయి. ఒక్కొకరు కనిష్టంగా ఒకటి, గరిష్టంగా రెండు పార్టీల్లోకి మారుతున్నారు. మారిన వాళ్లే మళ్లీ మళ్లీ మారిపోతున్నారు. ఈ క్రమంలో వారి మెడలో కండువాలు కూడా మారిపోతున్నాయి. ఆ కండువాల ఆర్డర్లతో చేనేత కార్మికులకు ఉపాధి పెరిగింది.

ఎన్నికలేవైనా జెండాలు, పార్టీ కండువాలకు సిరిసిల్ల బాగా ఫేమస్. రెండు తెలుగు రాష్ట్రాలకు ఇక్కడినుంచి కండువాలు, జెండాలు సప్లై చేస్తుంటారు. ఎలక్షన్ సీజన్లో కోట్ల రూపాయల్లోనే వ్యాపారం జరుగుతుంది. ఈ ఏడాది బిజినెస్ పెరిగిందని అంటున్నారు మాస్టర్ వీవర్స్. సిరిసిల్లలో 35వేలకు పైగా మరమగ్గాలు, వేల సంఖ్యలో కార్మికులు ఉన్నారు. మొత్తంగా ఈ ఏడాది ఎలక్షన్ సీజన్ లో రూ.5కోట్ల వరకు వ్యాపారం జరిగే అవకాశముందని అంచనా.

ఇటీవలే బతుకమ్మ చీరల తయారీతో నేతన్నలకు చేతినిండా పని దొరికింది. ఆ సీజన్ పూర్తయిన వెంటనే ఎన్నికల సీజన్ మొదలు కావడంతో వర్క్ ఆర్డర్లు కంటిన్యూ అయ్యాయి. అయితే ఈ ఏడాది కండువాలు, జెండాలకు గిరాకీ మరింత పెరిగింది. ఆ గట్టు, ఈ గట్టు మారుతూ.. నాయకుల ఇళ్లలో అన్ని రకాల కండువాలు ఉండే పరిస్థితి వచ్చింది. దీంతో అన్ని పార్టీల కండువాలకు గిరాకీ పెరిగింది. సిరిసిల్ల నేతన్నలకు ఉపాధి మెరుగైంది. ఈ సీజన్ అయిపోగానే.. సార్వత్రిక ఎన్నికల పని మొదలవుతుంది. అప్పుడు మిగతా రాష్ట్రాలనుంచి కూడా సిరిసిల్లకు ఆర్డర్లు వస్తాయంటున్నారు.