ఎమ్మెల్యే వేముల వీరేశం సైబర్‌ నేరగాళ్ల నగ్న వీడియో కాల్‌

ఎమ్మెల్యే వేముల వీరేశం సైబర్‌ మోసం నుంచి త్రుటిలో బైటపడ్డారు. ఇటీవల సైబర్‌ నేరగాళ్లు ఆయనకు నగ్న వీడియో కాల్‌ చేశారు. దాన్ని నిందితులు స్క్రీన్‌ రికార్డింగ్‌ చేశారు. అనంతరం ఆ వీడియోను తాజాగా ఎమ్మెల్యే నంబర్‌కు పంపించి బెదిరింపులకు దిగారు. డబ్బులు ఇవ్వకుంటే వీడియోను సోషల్‌మీడియాలో పోస్టు చేస్తామంటూ బెదిరించారు. సైబర్‌ మోసగాళ్ల పన్నాగాన్ని పసిగట్టిన ఎమ్మెల్యే వీరేశం వెంటనే నకిరేకల్‌ పోలీసులకు ఫిర్యాదు చేశారు. పోలీసుల సూచనతో ఆ నంబర్‌ను ఎమ్మెల్యే బ్లాక్‌ చేశారు. పోలీసులకు ఫిర్యాదు చేసిన అనంతరం వీరేశం మీడియాతో మాట్లాడుతూ.. సైబర్‌ ఘటనలపై ప్రజలు అప్రమత్తంగా ఉండాలని సూచించారు. ఇలాంటి ఘటనలు మీ దృష్టికి వస్తే పోలీసుల దృష్టికి తీసుకెళ్లాలని తెలపారు.