మ‌న భార‌త ర‌త్న...న్యూయార్క్ టైమ్స్‌కి  సో కాల్డ్... అట‌!

అమెరికా వార్తా ప‌త్రిక న్యూయార్క్‌ టైమ్స్ మ‌న దేశాన్ని మ‌రొక‌సారి కించ‌ప‌ర‌చింది. త‌న్మ‌య్ భ‌ట్ వివాదాస్ప‌ద వీడియో స‌చిన్ వ‌ర్సెస్ ల‌తా సివిల్ వార్ ని గురించి వార్త రాస్తూ ల‌తా మంగేష్క‌ర్‌ని సో..కాల్డ్ ప్లే బ్యాక్ సింగ‌ర్ అంటూ ప్ర‌స్తావించింది. ఇప్ప‌టికే వివాదాల‌ను ఎదుర్కొంటున్న ఈ వీడియో అంశంపై న్యూయార్క్ టైమ్స్ ఆజ్యం పోసే ప్ర‌య‌త్నం చేసింది. మ‌న‌దేశాన్ని, దేశంలోని ప్ర‌ముఖ వ్య‌క్తుల‌ను అప‌స‌వ్యంగా చిత్రీక‌రిస్తూ ప్ర‌పంచానికి మ‌న ఘ‌న‌త‌ని త‌గ్గించి చూప‌టం, లేదా వ‌క్రీక‌రించి చూప‌టం న్యూయార్క్ టైమ్స్‌కి అల‌వాటుగా మారింది.

అది ప్ర‌చురించిన ఆర్టిక‌ల్‌లో ఆ వీడియో ఎందుకు వివాదాస్ప‌దం అయ్యింది …అనే విష‌యాల‌ను త‌క్కువ‌గా రాసి, ముంబ‌యి పోలీసులు ఆ వీడియోని తొల‌గించ‌మని ఫేస్‌బుక్‌ని, యూ ట్యూబ్‌ని కోర‌డంపై ఎక్కువ‌గా దృష్టి పెట్టింది. స‌చిన్ టెండుల్క‌ర్‌ని పాపుల‌ర్ క్రికెట‌ర్ అని, ల‌తా మంగేష్క‌ర్‌ని బాలివుడ్ చిత్రాల‌కు పాట‌లు పాడే ఒకానొక…సింగ‌ర్ అని చెప్ప‌బ‌డుతున్న గాయ‌ని…అనే అర్థం వ‌చ్చేలా రాసింది.

న్యూయార్క్ టైమ్స్‌కి ఇది కొత్త‌కాదు, ఇంత‌కుముందు కూడా అది ఇండియాని కించ‌ప‌ర‌చేలా కార్టూన్ల‌ను ప్ర‌చురించింది. భార‌త్ య‌థార్థ‌స్థితిని ప్ర‌పంచం ముందు త‌గ్గించి చూపే ప్ర‌య‌త్నాల‌ను చేసింది. మిగిలిన దేశాల‌కంటే త‌క్కువ ఖ‌ర్చుతో అంగార‌క గ్ర‌హం క‌క్ష్య‌లోకి మంగ‌ళ‌యాన్‌ని భార‌త్‌ ప్ర‌వేశ‌పెట్టిన‌పుడు కూడా ఇలాగే, ఆ ప్ర‌య‌త్నాన్ని కించ‌ప‌ర‌చేలా కార్టూన్‌ని ప్ర‌చురించింది. ఇండియాస్ మార్స్ మిష‌న్… అనే వార్త ఉన్న పేప‌రుని చూస్తూ స్పేస్ క్ల‌బ్ లో కూర్చుని ఉన్న శాస్త్ర‌వేత్త‌ల వ‌ద్ద‌కు ….రైతు దుస్తుల్లో ఉన్న ఒక వ్య‌క్తి (అత‌ను ఇండియాకు ప్ర‌తిరూపం), ఆవుతో స‌హా వ‌చ్చి…త‌లుపు కొట్టిన‌ట్టుగా అందులో చిత్రీక‌రించారు. అప్పుడు కూడా ఆ ప‌త్రిక‌ తీరుపై విమ‌ర్శ‌లు రేగ‌టంతో, భార‌త్ త‌క్కువ ఖ‌ర్చుతో ఈ ప్ర‌యోగాన్ని చేసింద‌ని, ఇది ధ‌న‌వంత‌మైన దేశాల‌కే ప‌రిమితం కాద‌ని చెప్పడ‌మే తమ ప్ర‌య‌త్న‌మ‌ని ఎన్‌వైటి స‌ర్దిచెప్పుకుంది.

2015 డిసెంబ‌రులో ప్యారిస్ వాతావ‌ర‌ణ స‌ద‌స్సుకి భార‌త్ హాజ‌రైన సంద‌ర్భంలో కూడా న్యూయార్క్ టైమ్స్, భార‌త్‌ని అప‌హాస్యం పాలుచేసేలా మ‌రొక కార్టూన్‌ని ప్ర‌చురించింది. ఈ స‌ద‌స్సులో భార‌త్‌, అభివృద్ధి చెందిన దేశాలే పేద దేశాల కంటే ఎక్కువ‌గా కార్బ‌న్‌ని విడుద‌ల చేస్తున్నాయ‌ని, అవే ఉద్గారాల విడుద‌ల‌ను త‌గ్గించుకోవాల‌ని ప‌ట్టుబ‌ట్టింది. దీనిపై ఎన్‌వైటి ప్ర‌చురించిన కార్టూన్‌లో… ప్యారిస్ వాతావ‌ర‌ణ స‌ద‌స్సు అనే ట్రైన్‌కి ఒక పెద్ద ఏనుగు (భార‌త్‌కి ప్ర‌తిరూపం) అడ్డుగా కూర్చున్న‌ట్టుగా ఉంటుంది. మ‌నవాళ్లు నోరు తెరిస్తే అమెరికా గురించి గొప్ప‌లు చెబుతుంటే, అమెరికాలో ఇందుకు విరుద్ధంగా జ‌రుగుతుండ‌టం…గ‌మనించాల్సిన విష‌యం.