తెలంగాణ కేబినెట్‌ నిర్ణయాలు ఇవే

సీఎం రేవంత్‌రెడ్డి అధ్యక్షతన సమావేశమైన తెలంగాణ కేబినెట్‌ పలు కీలక నిర్ణయాలు తీసుకున్నది. సుమారు నాలుగు గంటలకుపైగా కొనసాగిన సమావేశంలో పలు కీలక అంశాలకు కేబినెట్‌ ఆమోదం తెలిపింది. ఈ మేరకు కేబినెట్‌ నిర్ణయాలను మంత్రి పొంగులేటి శ్రీనివాస్‌రెడ్డి, పొన్నం ప్రభాకర్‌ మీడియాకు వెల్లడించారు.

రాష్ట్ర ఆర్థిక పరిస్థితులను దృష్టిలో ఉంచుకుని దీపావళి పండుగ సందర్భంగా ఒక డీఏను విడుదల చేయాలని మంత్రివర్గం తీర్మానించింది. హైదరాబాద్‌లో మెట్రో రైలు రెండో దశ విస్తరణకు సంబంధించిన డీపీఆర్‌కు మంత్రివర్గం ఆమోదించింది. నాగోల్ – శంషాబాద్, రాయదుర్గం – కోకాపేట్, ఎంజీబీఎస్ – చాంద్రాయణగుట్ట, మియాపూర్ – పటాన్ చెరు, ఎల్ బీ నగర్ – హయత్ నగర్ మొత్తం 76.4 కిలోమీటర్ల మేరకు విస్తరణ చేపట్టాలని మంత్రిమండలి నిర్ణయించింది. కేంద్ర రాష్ట్ర ప్రభుత్వాల భాగస్వామ్య విధానంలో చేపట్టే మెట్రో రైలు రెండో దశ ప్రాజెక్టు కోసం రూ. 24,269 కోట్లతో ప్రతిపాదనలతో సిద్ధం చేసిన డీపీఆర్‌ను కేంద్రానికి నివేదించాలి. జీవో 317 కు సంబంధించి మంత్రివర్గ ఉపసంఘం సిఫారసుల మేరకు ఉద్యోగుల మెడికల్, స్పౌజ్, మ్యూచువల్ బదిలీలకు ఆమోదం. జీవో 46 కు సంబంధించి కీలకమైన స్థానికత అంశం రాష్ట్రపతి పరిధిలో ఉన్నందున న్యాయ సలహా తీసుకుని శాసనసభలో చర్చించిన తర్వాత నిర్ణయం. రాష్ట్రంలో నవంబర్ 30 వరకు కుల, ఆర్థిక, సామాజిక గణన సర్వే పూర్తి చేయాలి. ఇందుకోసం 80 వేల మంది ఎన్యుమరేటర్లను నియమించి నవంబర్ 4 నుంచి 19 వరకు రాష్ట్రమంతా ఇంటింటి సర్వే చేపడుతారు. రాష్ట్రంలో పంచాయతీ రాజ్, ఆర్ అండ్ బీ పరిధిలో చేపట్టాల్సిన రోడ్ల నిర్మాణానికి దాదాపు రూ. 25 నుంచి 28 వేల కోట్లు అవసరమని అంచనా వేయగా పీపీపీ విధానంలో పూర్తి చేయడానికి తగిన ప్రణాళికలు సిద్ధం చేయాలి. ఉస్మానియా ఆస్పత్రి కొత్త భవన నిర్మాణానికి గోషా మహల్ లో పోలీసు శాఖ పరిధిలోని స్థలాన్ని వైద్య శాఖకు బదిలీ. ములుగులో ప్రతిపాదిత గిరిజన విశ్వవిద్యాలయానికి 211 ఎకరాల స్థలం కేటాయింపు. గచ్చీబౌలీ స్టేడియాన్ని ప్రతిపాదిత యంగ్ ఇండియా ఫిజికల్ ఎడ్యుకేషన్ అండ్ స్పోర్ట్స్ యూనివర్సిటీకి బదలాయింపు. మధిర, వికారాబాద్, హుజూర్ నగర్ ఏటీసీల ఏర్పాటు, కావలసిన పోస్టుల మంజూరు. దీపావళి కానుకగా ప్రతి అసెంబ్లీ నియోజకవర్గంలో మొదటి విడతగా 3500 ఇళ్ల మంజూరు. రాష్ట్రంలో ప్రాజెక్టులు, రిజర్వాయర్లలో స్టోరేజీ కెపాసిటీ తగ్గిపోతున్న కారణంగా వాటిల్లో స్టిల్ట్ తొలగించాలని నిర్ణయం. పైలట్ ప్రాజెక్టుగా మొదట కడెం ప్రాజెక్టులో స్టిల్ట్ తొలగింపు.

మంత్రివర్గ నిర్ణయాలు ఇవే

• ఏటూరు నాగారాంను రెవెన్యూ డివిజన్‌గా ఏర్పాటు చేస్తూ కేబినెట్‌ తీర్మానం
• సమ్మక్క సారలమ్మ ట్రైబల్‌ వర్సిటీకి 211 ఎకరాలు అప్పగిస్తూ తీర్మానం
• మెట్రో రైలు మార్గాల విస్తరణకు కేబినెట్‌ ఆమోదం
• నాగోల్‌-ఎల్బీనగర్‌, ఎల్బీనగర్‌-హిమాయత్‌సాగర్‌, ఎల్బీనగర్‌-శంషాబాద్‌ విమానాశ్రయం వరకు మెట్రో విస్తరణ ఆమోదం
• నవంబర్‌ 30 లోపు కులగణన పూర్తికి నిర్ణయం
• పేదవాళ్లలో అతి పేదవాళ్లకు ఇందిరమ్మ ఇళ్లు
• దీపావళి కానుకగా ఈ నెల 31న ఇళ్ల కేటాయింపు
• దీపావళి కానుకగా ప్రభుత్వ ఉద్యోగులకు ఒక డీఏ
• స్పౌజ్‌, హెల్త్‌, మ్యూచువల్‌ ప్యాటర్న్స్‌లో ఉద్యోగుల బదిలీలకు ఆమోదం
• పీపీపీ విధానంలో రోడ్ల నిర్మాణానికి నిర్ణయం
• ఉస్మానియా ఆస్పత్రికి గోషామహల్‌లో స్థలం ఇవ్వాలనే నిర్ణయానికి కేబినెట్‌ ఆమోదం
• గచ్చిబౌలి స్టేడియాన్ని స్పోర్ట్స్‌ వర్సిటీకి వాడాలని నిర్ణయం
• 8 ప్రాంతాల్లో ఏర్పాటు చేసిన కొత్త కోర్టులకు సిబ్బంది కేటాయింపునకు నిర్ణయం