తెలంగాణకు మళ్లీ ప్రియాంక, రాహుల్.. నలుగురు సీఎంలు కూడా

తెలంగాణలో కాంగ్రెస్ ప్రచారాన్ని ఉధృతం చేయాలనుకుంటోంది. ఐదు రాష్ట్రాల అసెంబ్లీ ఎన్నికల కోసం కష్టపడుతున్న రాహుల్, ప్రియాంక.. ఇప్పటికే ఓ దఫా తెలంగాణ వచ్చి వెళ్లారు. ఆ పర్యటనలో వారిద్దరూ కలసి యాత్రల్లో పాల్గొన్నారు. ఇప్పుడు విడివిడిగా బహిరంగ సభలకు రాబోతున్నారు. దీనికి సంబంధించిన షెడ్యూల్ ఖరారైంది. కాంగ్రెస్ పాలిత రాష్ట్రాల ముఖ్యమంత్రులు కూడా తెలంగాణలో ఆ పార్టీ తరపున ప్రచారం చేయబోతున్నారు.

ఈ నెల 28న కర్నాటక సీఎం సిద్ధరామయ్యతో తెలంగాణలో రెండో విడత బస్సుయాత్ర ప్రారంభించాలని చూస్తున్నారు కాంగ్రెస్ నేతలు. రెండు రోజులపాటు సిద్ధరామయ్య ఈ యాత్ర చేపడతారు, ఆ తర్వాత కాంగ్రెస్ జాతీయ అధ్యక్షుడు మల్లికార్జున ఖర్గే 30వ తేదీన యాత్రలో పాల్గొంటారు. ఈ నెల 31న కొల్లాపూర్ లో నిర్వహించే భారీ బహిరంగ సభలో ప్రియాంక గాంధీ పాల్గొంటారని తెలుస్తోంది. జూపల్లి కృష్ణారావు చేరికల సభకు రావాల్సిన ప్రియాంక.. ఇప్పుడు ఆయన నియోజకవర్గంలో ఎన్నికల ప్రచార సభకు రాబోతున్నారు.

నవంబర్ లో రాహుల్..

నవంబర్ 1, 2 తేదీల్లో రాహుల్‌గాంధీ మరోసారి బస్సుయాత్ర, రోడ్‌ షోలలో పాల్గొంటారని తెలంగాణ కాంగ్రెస్ నేతలు చెబుతున్నారు. రాహుల్ తొలివిడత యాత్రకు మంచి స్పందన వచ్చిందని అంటున్న నేతలు.. ఈ యాత్రను కూడా విజయవంతం చేస్తామని ధీమా వ్యక్తం చేస్తున్నారు. రాజస్థాన్‌, ఛత్తీస్‌ ఘడ్, హిమాచల్‌ ప్రదేశ్‌ సీఎంలతోనూ రాష్ట్రంలో ప్రచారం చేయించాలని అనుకుంటున్నారు. సభలు, రోడ్‌ షోలకు రూట్‌ మ్యాప్‌ సిద్ధంచేస్తున్నారు. వచ్చేనెల 3 నుంచి నామినేషన్లు మొదలవుతాయి కాబట్టి.. ఆలోగా రెండో విడత బస్సుయాత్ర పూర్తి చేయాలనుకుంటున్నారు. నామినేషన్ల అనంతరం ప్రచారం స్పీడ్ మరింత పెంచుతామని చెబుతున్నారు.