ముఖ్యమంత్రిగా కేసీఆర్ అరుదైన రికార్డ్..

ఉమ్మడి ఆంధ్రప్రదేశ్, ఆ తర్వాత రెండు తెలుగు రాష్ట్రాల్లో ఇప్పటి వరకు 24మంది ముఖ్యమంత్రులుగా పనిచేశారు. ప్రస్తుతం ఏపీకి జగన్, తెలంగాణకు కేసీఆర్ సీఎంగా ఉన్నారు. అయితే ఈ 24మందిలో కేసీఆర్ అరుదైన రికార్డ్ సాధించబోతున్నారు. వరుసగా తొమ్మిదేళ్లపాటు సీఎంగా పాలన సాగించిన ఘనత సొంతం చేసుకోబోతున్నారు కేసీఆర్. జూన్-2తో ముఖ్యమంత్రిగా కేసీఆర్ తొమ్మిదేళ్ల పాలన పూర్తవుతుంది.

బాబు రికార్డ్ బద్దలు..

ఇప్పటి వరకు వరుసగా ఎనిమిదేళ్లపాటు సీఎంగా పనిచేసిన రికార్డ్ చంద్రబాబు పేరిట ఉంది. ఇక అత్యథిక కాలం సీఎంగా పనిచేసిన నాయకుడు కూడా ఆయనే. మూడు విడతల్లో చంద్రబాబు 13 ఏళ్ల 247 రోజులు ముఖ్యమంత్రిగా పనిచేశారు. వరుసగా 8 ఏళ్ల 256 రోజులు సీఎంగా చేశారు. రోజుల వారీ లెక్క తీస్తే బాబు రికార్డ్ ని ఇప్పటికే బద్దలు కొట్టారు తెలంగాణ సీఎం కేసీఆర్. సంవత్సరాల లెక్కను కూడా దాటేయబోతున్నారు. 9 ఏళ్లు ఏకబిగిన పరిపాలన సాగించిన తెలుగు రాష్ట్రాల ముఖ్యమంత్రిగా రికార్డులకెక్కుతున్నారు.

హ్యాట్రిక్ సీఎం కూడా కేసీఆరే..

ఇక వరుసగా మూడుసార్లు అధికారంలోకి వచ్చే హ్యాట్రిక్ సీఎంగా కూడా కేసీఆర్ రికార్డ్ సృష్టిస్తారనే అంచనాలున్నాయి. ప్రస్తుతం రెండోసారి ఆయన సీఎం పదవిలో ఉన్నారు. ఈ ఏడాది జరిగే ఎన్నికల తర్వాత తిరిగి బీఆర్ఎస్ తెలంగాణలో అధికారంలోకి వస్తుందనే అంచనాలున్నాయి. అంటే ముచ్చటగా మూడోసారి కూడా కేసీఆర్ సీఎంగా పగ్గాలు చేపడితే హ్యాట్రిక్ కొట్టినట్టవుతుంది.