రైలు ప్ర‌యాణికుల‌కు ముఖ్య గ‌మ‌నిక‌..! - 20, 21 తేదీల్లో ప‌లు రైళ్ల ర‌ద్దు.. మ‌రికొన్ని భారీగా ఆల‌స్యం

సికింద్రాబాద్ డివిజన్‌లోని ఘట్కేసర్- చర్లపల్లి స్టేషన్ల మధ్య చర్లపల్లి కోచింగ్ టెర్మినల్ నిర్మాణం జ‌రుగుతుండ‌టంతో ప‌లు రైళ్ల‌ను ర‌ద్దు చేస్తున్న‌ట్టు, మ‌రికొన్నింటిని రీ షెడ్యూల్ చేస్తున్న‌ట్టు అధికారులు వెల్ల‌డించారు. ఆర్‌యూబీ ప‌నుల దృష్ట్యా ఈ నిర్ణ‌యం తీసుకున్న‌ట్టు తెలిపారు. సికింద్రాబాద్ నుంచి ఇత‌ర ప్రాంతాల‌కు రాక‌పోక‌లు సాగించే రైలు ప్ర‌యాణికుల‌కు ఈ నెల 20, 21 తేదీల్లో దీనివ‌ల్ల అవాంత‌రం ఏర్ప‌డుతుంద‌ని వివ‌రించారు. ఈ ప‌నుల వ‌ల్ల ఈ నెల 20, 21 తేదీల్లో మొత్తం 17 రైళ్లు ర‌ద్దు కాగా, ఇంకొన్ని ప్రధాన రైళ్ల సర్వీసులు ఆలస్యంగా నడవనున్నాయని అధికారులు తెలిపారు. వాటి వివరాలను దక్షిణ మధ్య రైల్వే గురువారం రాత్రి ఒక‌ ప్రకటనలో వెల్లడించింది.

రద్దయిన రైళ్లు ఇవే..

ఈ నెల 21వ తేదీ ఆదివారం నాడు.. వరంగల్ - సికింద్రాబాద్ (రైలు నంబర్ 07757); సికింద్రాబాద్ -వరంగల్ (07462); వరంగల్ - హైదరాబాద్ (07463); హైదరాబాద్- కాజీపేట(07758); కాచిగూడ -మిర్యాలగూడ (07276); మిర్యాలగూడ-నడికుడి(07277); నడికుడి-మిర్యాలగూడ (07973); మిర్యాలగూడ-కాచిగూడ (07974); సికింద్రాబాద్- రేపల్లె(17645); గుంటూరు-వికారాబాద్(12747); వికారాబాద్-గుంటూరు (12748); హైదరాబాద్-సిర్పూర్ కాగజ్ నగర్(17011); సిర్పూర్ కాగజ్ నగర్- హైదరాబాద్(17012); సిర్పూర్ కాగజ్ నగర్ - సికింద్రాబాద్ (17234); సికింద్రాబాద్- గుంటూరు (17202); గుంటూరు- సికింద్రాబాద్ (17201); సికింద్రాబాద్- సిర్పూర్ కాగజ్ నగర్ (17233) రైళ్లు రద్దయినట్టు దక్షిణ మధ్య రైల్వే సీపీఆర్వో సీహెచ్. రాకేశ్ ఆ ప్ర‌క‌ట‌న‌లో వెల్లడించారు.

ఆల‌స్యంగా న‌డిచే రైళ్ల వివ‌రాలివీ..

ఈ నెల 20వ తేదీ శ‌నివారం నాడు.. కొన్ని ప్రధాన రైళ్లు గంట నుంచి 3 గంటల పాటు ఆలస్యంగా నడవనున్నాయి. హావ్డ్- సికింద్రాబాద్ ( రైలు నంబర్ 12703) మూడు గంటల పాటు ఆలస్యంగా బయల్దేరనుంది. శనివారం ఉదయం 8.35 గంటలకు బయల్దేరాల్సిన ఈ రైలును ఉదయం 11.35 గంటలకు రీషెడ్యూల్ చేశారు. భువనేశ్వర్- ముంబయి సీఎస్ఎంటీ(11020) రైలు కూడా మూడు గంటలు ఆలస్యంగా నడవనుంది. సాధారణంగా మధ్యాహ్నం 3.20 గంటలకు బయల్దేరాల్సిన ఈ రైలు సాయంత్రం 6.20 గంటలకు బయల్దేరనుంది. త్రివేండ్రం-సికింద్రాబాద్ (17229) రైలు 2 గంటలు ఆలస్యం కానుంది. ఉదయం 6.45 గంటలకు బయల్దేరే ఈ రైలు శనివారం (మే 20న) ఉదయం 8.45 గంటలకు బయల్దేరుతుంది. రాత్రి 11.20 గంటలకు బయల్దేరాల్సిన విశాఖపట్నం-ముంబయి ఎల్టీటీ (18519) రైలు గంట ఆలస్యంగా అర్ధరాత్రి 12.20 నిమిషాలకు బయల్దేరుతుంది. ఈ నెల 21వ తేదీ ఆదివారం సాయంత్రం 6.50 గంటలకు బయల్దేరాల్సిన సికింద్రాబాద్ -మన్మాడ్ (17064) రైలు 3 గంటలు ఆలస్యంగా రాత్రి 9.50గంటలకు బయల్దేరనుంది. ప్ర‌యాణికులు ఈ మార్పుల‌ను గ‌మ‌నించి స‌హ‌క‌రించాల‌ని రైల్వే అధికారులు ఆ ప్ర‌క‌ట‌న‌లో విజ్ఞ‌ప్తి చేశారు.