ఇవాళ ఢిల్లీకి రేవంత్‌.. అభ్యర్థుల ఎంపిక తుదిదశకు..?

సీఎం రేవంత్‌ రెడ్డి ఇవాళ ఢిల్లీకి వెళ్లనున్నారు. కాంగ్రెస్‌ ఎన్నికల కమిటీ సమావేశంలో ఆయన పాల్గొంటారు. సీఎం రేవంత్ రెడ్డితో పాటు డిప్యూటీ సీఎం భట్టి విక్రమార్క, సీఈసీలో మెంబర్‌గా ఉన్న మంత్రి ఉత్తమ్‌ కుమార్ రెడ్డి కూడా ఢిల్లీ వెళ్తారు.

ఈ సమావేశంలో మిగిలిన నియోజకవర్గాల్లో అభ్యర్థుల ఎంపికపై చర్చించనున్నారు. తెలంగాణలో ఇప్పటికే 9 స్థానాల్లో అభ్యర్థులను ఖరారు చేసిన కాంగ్రెస్‌.. మరో 8 స్థానాల్లో అభ్యర్థులను ప్రకటించాల్సి ఉంది. భువనగిరి, కరీంనగర్‌, నిజామాబాద్, వరంగల్‌, ఆదిలాబాద్, ఖమ్మం, మెదక్‌, హైదరాబాద్ స్థానాలకు అభ్యర్థులను ఎంపిక చేయాల్సి ఉంది.

17 పార్లమెంట్ స్థానాల్లో 12 నుంచి 14 స్థానాల్లో పాగా వేయాలని రేవంత్ రెడ్డి భావిస్తున్నారు. ఈ నేపథ్యంలో ఆచితూచి అభ్యర్థులను ఎంపిక చేస్తున్నట్లు సమాచారం. సర్వేలు, స్థానిక నేతల అభిప్రాయాల ఆధారంగానే అభ్యర్థుల ఎంపిక జరుగుతున్నట్లు సీఎం రేవంత్ చెప్పారు.