రేషన్ కార్డులు, జాబ్ క్యాలెండర్.. టీ.కేబినెట్ కీలక నిర్ణయాలు
రేషన్ కార్డుల జారీకి కేబినెట్ సబ్‌ కమిటీని నియమించింది. ఈ సబ్‌ కమిటీ రేషన్ కార్డుల జారీకి సంబంధించి విధివిధానాలు రూపొందించింది.
సీఎం రేవంత్ రెడ్డి అధ్యక్షతన సమావేశమైన తెలంగాణ కేబినెట్ కీలక నిర్ణయాలు తీసుకుంది. దాదాపు గంటన్నర పాటు జరిగిన ఈ సమావేశంలో జాబ్ క్యాలెండర్, రేషన్ కార్డులతో పాటు కీలక నిర్ణయాలు తీసుకుంది. రేషన్ కార్డుల జారీకి కేబినెట్ సబ్‌ కమిటీని నియమించింది. ఈ సబ్‌ కమిటీ రేషన్ కార్డుల జారీకి సంబంధించి విధివిధానాలు రూపొందించింది.
తెలంగాణ కేబినెట్ నిర్ణయాలు ఇవే..
- జాబ్ క్యాలెండర్‌కు కేబినెట్ ఆమోదం, రేపు అసెంబ్లీలో విడుదల చేయనున్న సీఎం రేవంత్
- జంట నగరాలకు గోదావరి జలాలు, మల్లన్న సాగర్ నుంచి శామీర్‌పేట చెరువుకు అక్కడి నుంచి ఉస్మాన్‌ సాగర్, హిమాయత్‌సాగర్‌లకు తీసుకురావాలని నిర్ణయం.
- వయనాడ్ మృతులకు సంతాపం, బాధితులకు సహాయం అందించాలని నిర్ణయం
- రేషన్ కార్డులతో పాటు హెల్త్‌ కార్డుల జారీపైనా చర్చ. ఇందుకోసం సబ్‌కమిటీ ఏర్పాటు
- క్రికెటర్ సిరాజ్‌, అథ్లెట్లు ఈషా సింగ్, నిఖత్ జరీన్‌లకు ఇళ్ల స్థలాలతో పాటు నిఖత్ జరీన్, సిరాజ్‌లకు గ్రూప్‌ -1 ఉద్యోగం
- దివంగత ఇంటెలిజెన్స్ డీజీ రాజీవ్ రతన్ కుమారుడికి మున్సిపల్ కమిషనర్‌గా ఉద్యోగం
- దివంగత అడిషనల్ డీజీపీ మురళీ కుమారుడికి డిప్యూటీ తహసీల్దార్‌గా ఉద్యోగం
- గౌరవెల్లి ప్రాజెక్టు కెనాల్స్ పూర్తి, మిగిలిన భూసేకరణ కోసం అంచనాలు తయారీకి ఆమోదం
- గవర్నర్ కోటాలో ఎమ్మెల్సీలుగా కోదండరాం, అమీర్ అలీ పేర్లను మరోసారి సిఫార్సు చేసిన కేబినెట్
- నిజాం షుగర్ ఫ్యాక్టరీ పునరుద్ధరణకు కేబినెట్ నిర్ణయం.
- ధరణి పోర్టల్ పేరు భూమాత పోర్టల్‌గా మార్పు
- GHMCలో శివారు మున్సిపాలిటీలు, మున్సిపల్ కార్పొరేషన్ల విలీనంపై కేబినెట్ సబ్‌ కమిటీ.. సబ్‌కమిటీలో శ్రీధర్ బాబు, సీతక్క, పొన్నం ప్రభాకర్