కేసీఆర్ పైనే భారం.. ఎట్టకేలకు రాజయ్య దరహాసం

బీఆర్ఎస్ జాబితాలో పేరు లేదని కన్నీటి పర్యంతం అయిన ఎమ్మెల్యే తాటికొండ రాజయ్య ఎట్టకేలకు ఇప్పుడు పూర్వ స్థితికి వచ్చారు. ప్రెస్ మీట్ లో జోకులేసి తన చుట్టూ ఉన్నవారిని నవ్వించారు, తాను కూడా నవ్వారు. దేవుడు, దేవుడు లాంటి కేసీఆర్ మనతో ఉన్నారు, మనకు అన్యాయం జరగదు అంటూ అనుచరులను ఓదార్చారు. ధర్మాసాగర్ లో బీసీ బంధు చెక్కుల పంపిణీ సందర్భంగా ఆయన కీలక వ్యాఖ్యలు చేశారు.

భూమి కొని, దుక్కిదున్ని, నారు పోసి, నీరు పోసి, పంట కోసి, చివరకు ధాన్యాన్ని రాశిగా చేస్తే.. చివర్లో ఎవరో వచ్చి దాని మీద కూర్చుంటానంటే ఊరుకుంటానా? అని ప్రెస్ మీట్ లో కీలక వ్యాఖ్యలు చేశారు స్టేషన్ ఘన్ పూర్ ఎమ్మెల్యే రాజయ్య. ఇంత పని చేసినం, హవ్వ.. రాశిమీద ఎవరినో ఎట్లా కూర్చోబెడతాం అని అన్నారాయన.

మీతోనే ఉంటా.. మీ మధ్యనే చచ్చిపోతా..

ఆరునూరైనా రాబోయే రోజుల్లో తాను ప్రజా జీవితంలో ఉంటానన్నారు రాజయ్య. ఎవరో వచ్చి నా సీట్లో కూర్చుంటానంటే ఎట్లా అని ప్రశ్నించారు. ప్రజల మధ్యలోనే ఉంటానని, ప్రజల మధ్యే చచ్చిపోతానని చెప్పారు. రేపోమాపో మనం అనుకున్న కార్యక్రమం జరుగుతుంది అన్నారు. మీకోసం నేనుంటా, మీకోసం ప్రాణమిస్తానని అనుచరులకు ధైర్య వచనాలు చెప్పారు రాజయ్య.

♦