రేవంత్‌ నా మాట గుర్తు పెట్టుకో.. కేటీఆర్ స్ట్రాంగ్ కౌంటర్‌

రాజీవ్‌గాంధీ విగ్రహం ఏర్పాటుకు సంబంధించి సీఎం రేవంత్ రెడ్డి చేసిన వివాదాస్పద వ్యాఖ్యలకు స్ట్రాంగ్ కౌంటర్ ఇచ్చారు బీఆర్ఎస్ వర్కింగ్ ప్రెసిడెంట్ కేటీఆర్. "చీప్‌ మినిస్టర్‌" రేవంత్ నా మాటలు గుర్తు పెట్టుకోవాలంటూ ట్వీట్ చేశారు. అధికారంలోకి వచ్చిన రోజునే సెక్రటేరియట్‌ పరిసరాల్లోని చెత్తచెదారాన్ని తొలగిస్తామంటూ స్పష్టం చేశారు కేటీఆర్.

రేవంత్ రెడ్డి లాంటి ఢిల్లీ గులాములు తెలంగాణ గౌరవాన్ని, ఆత్మగౌరవాన్ని అర్థం చేసుకుంటారని ఆశించలేమన్నారు కేటీఆర్. స్కూల్ పిల్లల ముందు రేవంత్‌రెడ్డి ఉపయోగించిన నీచమైన పదజాలాన్ని చూస్తుంటే ఆయన‌ ఆలోచనకు, ఆయన అసభ్యకరమైన పెంపకానికి అద్దం పడుతోందన్నారు. రేవంత్ మానసిక ఆరోగ్య పరిస్థితి త్వరగా మెరుగ‌వ్వాలంటూ ఆకాంక్షించారు.

అంతకుముందు రాజీవ్ గాంధీ జయంతి సందర్భంగా ఏర్పాటు చేసిన కార్యక్రమంలో మాట్లాడిన రేవంత్ రెడ్డి.. కేటీఆర్, కేసీఆర్‌లను ఉద్దేశించి తీవ్రమైన వ్యాఖ్యలు చేశారు. సెక్రటేరియట్ ముందు రాజీవ్ విగ్రహాన్ని తొలగిస్తామంటూ కేటీఆర్ చేసిన వ్యాఖ్యలపై మండిపడ్డారు. ఆ స్థానంలో కేసీఆర్ విగ్రహం పెట్టాలని కేటీఆర్ అనుకున్నాడని, కేసీఆర్ పోయేదెప్పుడు, విగ్రహం పెట్టేదెప్పుడు అంటూ రేవంత్ చేసిన వ్యాఖ్యలు తీవ్ర చర్చనీయాంశమయ్యాయి. రేవంత్ వ్యాఖ్యలపై బీఆర్ఎస్‌ శ్రేణులు మండిపడుతున్నాయి.