హైద‌రాబాద్ రైల్ @ చ‌ర్ల‌ప‌ల్లి స్టేష‌న్‌

విద్య‌, ఉపాధి, వైద్యం, వ్యాపార వ్య‌వ‌హారాల‌కు తెలుగు రాష్ట్రాల్లో అతిపెద్ద గ‌మ్య‌స్థానంగా మారిన హైద‌రాబాద్‌కు వంద‌ల రైళ్లు వ‌చ్చి వెళుతుంటాయి. ఇందుకోసం న‌గ‌రంలో ఇప్ప‌టికే హైదరాబాద్‌, సికింద్రాబాద్, కాచిగూడ స్టేష‌న్లు ఉన్నాయి. అయినా రైళ్ల ర‌ద్దీకి అవి స‌రిపోవడం లేదు. ఈ నేప‌థ్యంలో శాటిలైట్ స్టేష‌న్‌గా న‌గ‌ర శివార్ల‌లోని చ‌ర్ల‌ప‌ల్లి స్టేష‌న్‌ను సిద్ధం చేశారు.

ఇక్క‌డి నుంచి 25 జ‌త‌ల ఎక్స్‌ప్రెస్ రైళ్లు రాక‌పోక‌లు సాగించేందుకు నిర్ణ‌యించిన సౌత్ సెంట్ర‌ల్ రైల్వే అధికారులు రైల్వే శాఖ‌ను అనుమ‌తి కోరుతూ లేఖ‌లు పంపారు. తాజాగా వీటిలో 3 జ‌తల ఎక్స్ ప్రెస్ రైళ్లు ఇక్క‌డి నుంచే రాక‌పోక‌లు సాగించేందుకు అనుమ‌తులు వ‌చ్చాయి. మ‌రో 6 జతల ఎక్స్‌ప్రెస్ రైళ్లకు కొత్త‌గా చ‌ర్ల‌ప‌ల్లిలో హాల్ట్ ఇచ్చారు.

చ‌ర్ల‌ప‌ల్లి నుంచే బ‌య‌ల్దేరే రైళ్లు

షాలిమార్ - హైద‌రాబాద్ ఈస్ట్‌కోస్ట్ ఎక్స్‌ప్రెస్ హైద‌రాబాద్ నుంచి క‌ల‌కత్తా వ‌ర‌కు వెళ్లేవారికి ఎంతో ఫేమ‌స్‌. ఇక‌పై ఈ ట్రైన్ చ‌ర్ల‌ప‌ల్లి నుంచి స్టార్ట్ అవుతుంది. ఎంజీఆర్ చెన్నై సెంట్ర‌ల్ - హైదరాబాద్ ఎక్స్‌ప్రెస్‌, గోరఖ్‌పూర్ - సికింద్రాబాద్ ఎక్స్‌ప్రెస్ కూడా ఇక్క‌డి నుంచే స్టార్ట‌వుతాయి. అలాగే అటు నుంచి వ‌చ్చే ఈ మూడు రైళ్లు కూడా చ‌ర్ల‌ప‌ల్లి వ‌ర‌కే న‌డుస్తాయి.

ఈ రైళ్ల‌కు కొత్తగా హాల్టింగ్‌

ఇక హైద‌రాబాద్ - సిర్పూర్ కాగ‌జ్‌న‌గ‌ర్‌, సికింద్రాబాద్ -సిర్పూర్ కాగ‌జ్‌న‌గ‌ర్‌, సికింద్రాబాద్ -సిర్పూర్‌కాగ‌జ్ న‌గ‌ర్ భాగ్య‌న‌గ‌ర్ ఎక్స్‌ప్రెస్‌, గుంటూరు- సికింద్రాబాద్ గోల్కొండ ఎక్స్‌ప్రెస్, గుంటూరు - సికింద్రాబాద్ ఎక్స్‌ప్రెస్‌, విజ‌య‌వాడ‌- సికింద్రాబాద్ శాత‌వాహ‌న ఎక్స్‌ప్రెస్‌ల‌కు కొత్త‌గా చ‌ర్ల‌ప‌ల్లిలో హాల్ట్ ఇచ్చారు. ఈ రైళ్లు చ‌ర్ల‌ప‌ల్లిలో ఆగ‌నున్నాయి. దీని ద్వారా చుట్టుప‌క్క‌ల ప్రాంతాల‌వారు సికింద్రాబాద్‌, హైద‌రాబాద్ స్టేష‌న్ల వ‌ర‌కు వెళ్ల‌క్క‌ర్లేకుండా చ‌ర్ల‌ప‌ల్లిలో దిగి గ‌మ్య‌స్థానాల‌కు చేరుకోవ‌చ్చు. దీనివల్ల ప్ర‌ధాన స్టేష‌న్ల‌లో ర‌ద్దీ కూడా త‌గ్గుతుంది.