మూసీ నీళ్ళ మురికితో కడిగినా నీ నోరు మురికి పోదు

సీఎం రేవంత్ రెడ్డి చిల్లర వ్యాఖ్యల పట్ల మాజీ మంత్రి హరీశ్‌ రావు తీవ్రస్థాయిలో ధ్వజమెత్తారు. సీఎం స్థాయిని మరిచి రేవంత్‌లా వికృతంగా మాట్లాడే వారూ ఎవరూ ఉండరని ఆగ్రహం వ్యక్తం చేశారు.

'కనకపు సింహాసనమున

శునకము కూర్చుండబెట్టి శుభలగ్నమునం

దొనరగ బట్టము కట్టిన

వెనుకటి గుణమేల మాను వినురాసుమతీ!' అన్న సుమతీ శతకం ముఖ్యమంత్రి రేవంత్ రెడ్డికి సరిగ్గా సరిపోతుందని ఎద్దేవా చేశారు.

కేసీఆర్ కాలి గోటికి కూడా సరిపోని నువ్వు, సీఎం స్థాయి దిగజారి మాట్లాడుతున్నావని మండిపడ్డారు. తప్పు మీద తప్పు చేసి వదరబోతులా ప్రవర్తిస్తున్న రేవంత్‌రెడ్డి తీరును ప్రజలందరు గమనిస్తున్నారు. నీ పుట్టిన రోజున తండ్రి వయసున్న కేసీఆర్ మీద, తెలంగాణ కోసం కొట్లాడిన గొప్ప వ్యక్తి మీద, నువ్వు చేసిన నీచమైన వ్యాఖ్యలు అత్యంత హేయమైనవి. నీ లాగా వికృతంగా మాట్లాడే ముఖ్యమంత్రిని ఈ దేశం ఎప్పుడూ చూసి ఉండదన్నారు. మూసీ నీళ్ళ మురికితో కడిగినా నీ నోరు మురికి పోదు. నీ వంకర బుద్ధి ఇగ మారదు. నీ లాగా చిల్లరగా మేము మాట్లాడలేము అన్నారు.

పోరాడి సాధించుకున్న రాష్ట్రాన్ని, అభివృద్ధి పథంలో నడిపిన గంభీరమైన చరిత్ర మాది. బ్యాగులు మోసి, బ్యాగులు పంచి అడ్డ తోవన అధికారంలోకి వచ్చిన నీచ చరిత్ర నీది. నీ దోపిడీని, నీ దొంగబుద్ధిని నిరూపించి ప్రజా క్షేత్రంలోనే నీకు బుద్ధి చెబుతం.పిచ్చి ప్రగల్భాలు మాని పరిపాలన మీద దృష్టి పెట్టు. నిరంకుశత్వం మాని నిర్మాణాత్మక నిర్ణయాలపై శ్రద్ద వహించు అని హరీశ్‌ సూచించారు.