అబద్దానికి అంగీ లాగు తొడిగితే అదే కాంగ్రెస్ సర్కార్

అబద్ధానికి అంగీ లాగు తొడిగితే అదే కాంగ్రెస్‌ సర్కార్‌ అని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ 'ఎక్స్‌' వేదికగా ఎద్దేవా చేశారు. ఏడాది పాలనలో ఏం సాధించారని విజయోత్సవాలు చేసుకుంటున్నారని ప్రశ్నించారు. ''సిగ్గు లేదా జీడిగింజా అంటే.. నల్లగున్న నాకేం సిగ్గు అన్నదంట.. రైతుభరోసాకు ఎగనామం పెట్టి.. రుణమాఫీ పేరుతో పంగనామాలు పెట్టి.. పంటల కొనుగోళ్లకు శఠగోపం పెట్టి.. ధాన్యం క్వింటాల్‌ కు రూ.500 బోనస్ ఎగ్గొట్టి.. దిలావర్ పూర్ లో దమనకాండ సృష్టించి.. రామన్నపేటను రావణకాష్టం చేసి.. లగచర్ల రైతులను జైలుపాలు చేసి అల్లుడి కళ్లలో ఆనందం చూసినందుకా.. రైతు పండుగలా..? పండుగలు మీకు.. పస్తులు రైతులకు.. చెప్పింది బారాణా.. చేసింది చారాణా..'' అని మండిపడ్డారు. రైతులు తమ పంట కొనుగోళ్ల కోసం ఎదురు చూస్తున్నా నిబంధనల పేరుతో వడ్లు కొనడం లేదని, వేరే దిక్కు లేక రైతులు ప్రైవేట్‌ వ్యాపారులకు తక్కువ ధరకు అమ్ముకుంటున్నారని తెలిపారు. రైతులను నిండా ముంచి వ్యవసాయాన్ని ఆగం చేసినందుకు రైతు సంబరాలా అని ప్రశ్నించారు.