వాట్సప్ లో బూతు వీడియో.. తెలంగాణ కాంగ్రెస్ నేతకు షాక్

మన సెల్ ఫోన్ నుంచి వాట్సప్ లో కి వెళ్లే సందేశాలకు, ఫొటోలకు పూర్తిగా మనదే బాధ్యత. అలాంటిది ఓ రాజకీయ నాయకుడి సెల్ ఫోన్ నుంచి వాట్సప్ గ్రూప్ లో ఏదయినా మెసేజ్ వచ్చిందంటే అందరికీ ఆసక్తి ఉంటుంది. అయితే అది ఓ బూతు వీడియో. దీంతో ఈ వ్యవహారం తెలంగాణ రాజకీయాల్లో కలకలం రేపింది.

ఆ నాయకుడు మరెవరో కాదు కాంగ్రెస్ సీనియర్ నేత, మాజీ మంత్రి గడ్డం వినోద్. ఆయన ఫోన్ నుంచి మంచిర్యాల జిల్లా వాట్సప్ గ్రూప్ లో ఓ వీడియో షేర్ అయింది. అది బూతు వీడియో కావడంతో అందరూ షాకయ్యారు. అది కూడా గడ్డం వినోద్ పర్సనల్ నెంబర్ నుంచి రావడంతో వెంటనే ఫోన్ చేసి ఆయనకు సమాచారం ఇచ్చారు.

అబ్బెబ్బే.. అది నేను కాదు..

ఆ ఫోన్ నాదే, ఆ నెంబర్ నాదే, కానీ ఆ వీడియో పెట్టింది నేను కాదు అంటున్నారు గడ్డం వినోద్. తనకి రెండు ఫోన్లు ఉన్నాయని, ఒక నెంబర్ ఎప్పుడూ తన డ్రైవర్ దగ్గర ఉంటుందని. అతని పొరపాటు వల్ల ఆ వీడియో వాట్సప్ గ్రూప్ లో షేర్ అయిందని వివరణ ఇచ్చారు. డ్రైవర్ తప్పిదంతో జరిగిన దానికి తనను బాధ్యుడిని చేయడం సరికాదంటున్నారు. ఈ విషయాన్ని ఇక్కడితో వదిలేయాలని విజ్ఞప్తి చేశారు.

వినోద్ వదిలేయాలని చెప్పినా.. ఆయన సెల్ ఫోన్ నుంచి వచ్చిన వీడియో ఇప్పుడు మంచిర్యాల జిల్లాలో హాట్ టాపిక్ గా మారింది. ఎన్నికల వేళ పార్టీకి తలవొంపులు తెచ్చేలా ప్రవర్తించడమేంటని కాంగ్రెస్ నేతలు రుసరుసలాడుతున్నారు.