కర్నాటకలో మంకీ ఫీవర్‌.. ఇద్దరు మృతి
మంకీ ఫీవర్‌ సోకిన వారిలో తీవ్రమైన జ్వరం, ఒళ్లు నొప్పులు, తలనొప్పి కనిపిస్తాయని రణ్‌దీప్‌ ఈ సందర్భంగా చెప్పారు. ఈ వ్యాధి సోకకుండా వ్యాక్సిన్‌ వేయించేందుకు ఐసీఎంఆర్‌ ప్రతినిధులతో సంప్రదింపులు చేస్తున్నామని తెలిపారు.
కర్నాటక రాష్ట్రంలో మంకీ ఫీవర్‌తో ఇద్దరు మృతిచెందారు. మృతుల్లో 18 సంవత్సరాల యువతి, 79 సంవత్సరాల వృద్ధుడు ఉన్నారు. కర్ణాటక ఆరోగ్య, కుటుంబ సంక్షేమ శాఖ కమిషనర్‌ రణ్‌ దీప్‌ ఆదివారం ఈ వివరాలు వెల్లడించారు. శివమొగ్గ జిల్లా హొసనగర తాలూకాకు చెందిన యువతి, ఉడుపి జిల్లా మణిపాల్‌కు చెందిన ఒక వృద్ధుడు చికిత్స పొందుతూ ప్రాణాలు కోల్పోయారని వారు తెలిపారు.
ఇవి కాకుండా ఇంకా ఉత్తర కన్నడలో 34, శివమొగ్గలో 12, చిక్కమగళూరులో 3 కేసులు నమోదైనట్టు రణ్‌దీప్‌ వెల్లడించారు. శివమొగ్గలో చికిత్స పొందుతున్న రోగుల వివరాలను వైద్యులను అడిగి తెలుసుకున్న ఆయన ఈ ఏడాదిలో ఇప్పటివరకు 2,288 నమూనాలను సేకరించి పరీక్షించగా, అందులో 48 మందికి మంకీ ఫీవర్‌ ఉన్నట్టు గుర్తించామని చెప్పారు.
మంకీ ఫీవర్‌ సోకిన వారిలో తీవ్రమైన జ్వరం, ఒళ్లు నొప్పులు, తలనొప్పి కనిపిస్తాయని రణ్‌దీప్‌ ఈ సందర్భంగా చెప్పారు. ఈ వ్యాధి సోకకుండా వ్యాక్సిన్‌ వేయించేందుకు ఐసీఎంఆర్‌ ప్రతినిధులతో సంప్రదింపులు చేస్తున్నామని తెలిపారు. ఈ వ్యాధికి ప్రాథమిక దశలోనే చికిత్స చేయించుకోవాలని అవగాహన కల్పిస్తున్నట్టు ఆయన చెప్పారు. కోతులను కరిచే కీటకాలు మళ్లీ మనిషిని కుడితే ఈ వ్యాధి సోకుతుందని ఈ సందర్భంగా ఆయన వెల్లడించారు.