ఆరు పరుగులకే ఆలౌట్ ... మహిళా టీ-20 క్రికెట్లో మరో చెత్త రికార్డు

• ఆరు పరుగులకే మాలీజట్టు ఆలౌట్
• చైనా 14 పరుగుల చెత్త రికార్డు తెరమరుగు
• ఫార్సుగా తయారైన మహిళా క్రికెట్

మహిళా క్రికెట్ ను విశ్వవ్యాప్తం చేయాలన్న ఐసీసీ వ్యూహం బెడిసి కొడుతోంది. చివరకు మర్యాదస్తుల క్రీడ క్రికెట్ ..మర్యాదనే కోల్పోయే ప్రమాదంలో పడిపోతోంది.

క్రికెట్ ఆటలో ఆరు పరుగులు సాధించడానికి ఓ సిక్సర్ షాట్ కొడితే చాలు. అయితే.. మహిళా టీ-20 అంతర్జాతీయ మ్యాచ్ లో మాత్రం.. మాలీ మహిళా క్రికెట్ జట్టు కేవలం ఆరు పరుగులకే కుప్పకూలి…అతితక్కువ పరుగులకు ఆలౌటైన జట్టుగా చెత్తరికార్డును మూటగట్టుకొంది.

కిగాలీ సిటీ వేదికగా జరుగుతున్న కివీబుకా అంతర్జాతీయ మహిళా టీ-20టోర్నీలో భాగంగా…రువాండోతో జరిగిన పోటీలో మాలీ కేవలం 6 ఓవర్లలో.. ఆరు పరుగులకే కుప్పకూలింది. మాలి సాధించిన మొత్తం ఆరుపరుగుల స్కోరులో మారిమా ఒక్క పరుగు సాధించగా.. మిగిలిన 5 పరుగులూ.. ఎక్స్ ట్రాల రూపంలో వచ్చినవే కావడం విశేషం.

సమాధానంగా 7 పరుగుల టార్గెట్ తో చేజింగ్ కు దిగిన రువాండా 4 బాల్స్ లోనే విజయం సొంతం చేసుకోగలిగింది.

గత ఏడాది యునైటెడ్ అరబ్ ఎమిరేట్స్ తో జరిగిన టీ-20 మ్యాచ్ లో చైనా సాధించిన 14 పరుగుల స్కోరే పరమచెత్త ప్రపంచ రికార్డుగా ఉంది.

ఇప్పుడు మాలీ 6 పరుగులకే కుప్పకూలడం ద్వారా చైనా రికార్డును వెనక్కునెట్టగలిగింది.

ఎమిరేట్స్ 20 ఓవర్లలో 3 వికెట్లకు 203 పరుగుల భారీస్కోరు సాధిస్తే..సమాధానంగా చైనా 10 ఓవర్లలో 14 పరుగులకే కుప్పకూలడం నిన్నటి వరకూ..ఓ ప్రపంచ రికార్డుగా నిలిచిపోయింది.