అమెరికా H1-B వీసా స్కామ్‌.. నిందితుల్లో కాంగ్రెస్ నేత!

అమెరికాలో వెలుగులోకి వచ్చిన H1-B వీసా స్కామ్‌లో చిక్కుకున్నారు కాంగ్రెస్‌ నేత, ఆదిలాబాద్ ఎమ్మెల్యే అభ్యర్థిగా పోటీ చేసిన‌ కంది శ్రీనివాస్ రెడ్డి. H1-B వీసా రిగ్గింగ్‌కు పాల్పడిన ప్రధాన నిందితుల్లో కంది శ్రీనివాస్ రెడ్డి ఒకరు. ఒకే అభ్యర్థికి దాదాపు 30 సార్లు H1-B వీసా దరఖాస్తు చేసినట్లు తెలుస్తోంది.

2022లో ఇండియాకు వచ్చిన కంది శ్రీనివాస్ రెడ్డి.. మొదట్లో బీజేపీ నుంచి పోటీ చేయడానికి ప్రయత్నాలు చేశారు. ఇందుకోసం బీఎల్‌ సంతోష్‌ ద్వారా బీజేపీ హైకమాండ్‌తో చర్చలు జరిపారు. అయితే ఆ ప్రయత్నాలు సక్సెస్ కాకపోవడంతో కాంగ్రెస్‌లో చేరి ఆదిలాబాద్‌ అసెంబ్లీ టికెట్ దక్కించుకున్నారు. ఆ ఎన్నికల్లో ఆయన మూడో స్థానంలో నిలిచారు. ప్రస్తుతం ఆదిలాబాద్ అసెంబ్లీ నియోజకవర్గ కాంగ్రెస్ ఇన్‌ఛార్జిగా కొనసాగుతున్నారు. ఇక ఎన్నికల టైమ్‌లో మహిళా ఓటర్లకు కుక్కర్లు పంచడంపై ఆయనపై కేసు నమోదైంది. ఇటీవల ఓ ప్రముఖ ఛానల్‌ (TV9) రిపోర్టర్‌ను సైతం బెదిరించారని కేసు నమోదైంది.

ఇక అమెరికాలో ఉన్న కంది శ్రీనివాస్ రెడ్డి ఐటీ సంస్థ టర్నోవర్ రూ.800 కోట్లని సమాచారం. గతంలో రాహుల్ గాంధీ, రేవంత్ రెడ్డి అమెరికా పర్యటనకు సంబంధించిన మొత్తం ఖర్చు శ్రీనివాస్ రెడ్డి భరించారని తెలుస్తోంది. H1-B వీసా అనేది నాన్ ఇమ్మిగ్రెట్ వీసా. ఈ వీసా అమెరికా కంపెనీలు ప్రత్యేకమైన ఉద్యోగాలలో విదేశీయులను నియమించుకునేందుకు అనుమతి ఇస్తుంది. అయితే కొన్ని కంపెనీలు ఈ వీసాను దుర్వినియోగం చేసినట్లు స్పష్టమైంది.