లావా నుంచి లేటెస్ట్ ఫోన్! బడ్జెట్‌లో మంచి ఫీఛర్లు!

ప్రముఖ ఇండియన్ స్మార్ట్ ఫోన్ బ్రాండ్ ‘లావా’ గతేడాది నుంచి ఫామ్‌లోకి వచ్చింది. తక్కువ ధరలో మంచి ఫీచర్లున్న ఫోన్స్‌ను రిలీజ్ చేస్తూ చైనీస్ బ్రాండ్స్‌కు పోటీగా నిలుస్తుంది. తాజాగా రూ. 7,000 ప్రైస్ రేంజ్‌లో మరో ఫోన్ లాంఛ్ చేసింది. ఫోన్ ఫీచర్ల వివరాల్లోకి వెళ్తే..

దేశీయ మొబైల్ తయారీ సంస్థ లావా నుంచి రీసెంట్‌గా లాంఛ్ అయిన ‘లావా యువ 3’ మొబైల్ మార్కెట్‌లోకి అందుబాటులోకి వచ్చింది. ఇది లావా యువ 2 ఫోన్‌కు కొనసాగింపు. ఇది ఆక్టాకోర్ యూనిసోక్ టీ606 ఎస్‌వోసీ ప్రాసెసర్‌‌పై పని చేస్తుంది. ఆండ్రాయిడ్ 13 వర్షన్‌పై రన్ అవుతుంది. రెండేళ్ల సాఫ్ట్‌వేర్ అప్‌డేట్స్‌తో పాటు సెక్యూరిటీ అప్‌డేట్స్ కూడా అందిస్తున్నారు. ఇందులో 6.5 అంగుళాల హెచ్‌డీ ప్లస్ పంచ్ హోల్‌ డిస్‌ప్లేతో పాటు90 హెర్ట్జ్ రీఫ్రెష్ రేటు ఉంటుంది.

ఇందులో 18 వాట్స్ ఫాస్ట్ చార్జింగ్‌ను సపోర్ట్ చేసే 5000 ఎంఏహెచ్ బ్యాటరీ ఉంటుంది. ఫోన్‌లో వెనుక వైపు ట్రిపుల్ కెమెరా సెటప్ అమర్చారు. 13-మెగా పిక్సెల్ ప్రైమరీ సెన్సర్‌‌తో పాటు ఏఐ- సెన్సర్, వీజీఏ సెన్సర్స్ కూడా ఉన్నాయి. సెల్ఫీల కోసం 5-మెగా పిక్సెల్ ఫ్రంట్ కెమెరా ఉంటుంది. వీటితోపాటు వర్చువల్ ర్యామ్, సైడ్ మౌంటెడ్ ఫింగర్ ప్రింట్ సెన్సర్, 4జీ ఎల్‌టీఈ సపోర్ట్, వైఫై, జీపీఎస్, బ్లూటూత్ 5.0, యూఎస్‌బీ టైప్–సీ పోర్ట్ కనెక్టివిటీ వంటి ఫీచర్లు ఉన్నాయి.

ఈ స్మార్ట్‌ఫోన్ ప్రీమియం లుక్ డిజైన్‌తో ఆకర్షణీయంగా ఉంటుంది. రోజువారీ పనులను ఈజీగా హ్యాండిల్ చేస్తుంది. బ్యాటరీ బ్యాకప్ ఒక రోజంతా వస్తుంది. అయితే ఈ ప్రాసెసర్ హై ఎండ్ గేమ్స్‌ను సపోర్ట్ చేయదు.

లావా యువ 3 ఫోన్ కాస్మిక్ లావెండర్, ఎక్లిప్స్ బ్లాక్, గెలాక్సీ వైట్ రంగుల్లో లభిస్తుంది. ధరల విషయానికొస్తే 4జీబీ ర్యామ్ విత్ 64 జీబీ స్టోరేజీ వేరియంట్ ధర రూ.6,799, 4జీబీ ర్యామ్ విత్ 128 జీబీ స్టోరేజీ వేరియంట్ రూ.7,299గా ఉంది.