రాహుల్‌ గాంధీతో సీఎం రేవంత్‌ రెడ్డి భేటీ
చాలాకాలం తర్వాత తెలంగాణ ముఖ్యమంత్రికి అపాయింట్‌మెంట్‌
కాంగ్రెస్‌ అగ్రనేత, లోక్‌సభలో ప్రధాన ప్రతిపక్షనేత రాహుల్‌ గాంధీతో తెలంగాణ సీఎం రేవంత్‌ రెడ్డి భేటీ అయ్యారు. శనివారం మధ్యాహ్నం సోనియాగాంధీ అధికారిక నివాసం 10 జెన్‌పథ్‌లో రాహుల్‌ గాంధీని రేవంత్‌ రెడ్డి కలిశారు. చాలాకాలం తర్వాత తెలంగాణ ముఖ్యమంత్రికి కాంగ్రెస్‌ అగ్రనేత అపాయింట్‌మెంట్‌ ఇచ్చారు. తెలంగాణ ప్రభుత్వం చేపట్టిన కులగణన, ఎస్సీ వర్గీకరణ గురించి రాహుల్‌ కు రేవంత్‌ వివరించినట్టు సమాచారం. త్వరలో సూర్యాపేట, మెదక్‌ లో నిర్వహించే భారీ బహిరంగ సభల్లో ఏదో ఒక సభకు హాజరుకావాలని రాహుల్‌ గాంధీని ఆహ్వానించినట్టుగా తెలుస్తోంది. శుక్రవారం రాత్రే ఢిల్లీకి చేరుకున్న రేవంత్‌ రెడ్డి శనివారం ఉదయం రాష్ట్రానికి చెందిన కాంగ్రెస్‌ ఎంపీలతో కలిసి 10 జెన్‌పథ్‌ కు వెళ్లారు. రాహుల్‌ తో సమావేశం సందర్బంగా కేబినెట్‌ విస్తరణ, పీసీసీ కార్యవర్గం నియామకం, నామినేటెడ్‌ పదవుల భర్తీ, స్థానిక సంస్థల ఎన్నికలు సహా పలు అంశాల గురించి చర్చించనట్టుగా ఊహాగానాలు సాగుతున్నాయి. రాహుల్‌తో భేటీ సందర్భంగా ఇంకా ఏయే అంశాలు చర్చకు వచ్చాయి.. ఏం జరిగిందనే వివరాలు తెలియాల్సి ఉంది.