కాపీ కొట్టారంటే పదేళ్ల జైలు, కోటి జరిమానా
పబ్లిక్‌ ఎగ్జామినేషన్స్‌ బిల్లు-2024ను ఫిబ్రవరి 6న లోక్‌సభ ఆమోదించింది. 9న రాజ్యసభలో ఆమోదం పొందింది. అదే నెల 12న రాష్ట్రపతి ఆమోదముద్ర వేశారు.
నీట్‌, యూజీసీ నెట్‌ పేపర్‌ లీకవ్వ‌డం దేశవ్యాప్తంగా ప్రకంపనలు రేపుతోంది. తీవ్ర నిరసనలు వెల్లువెత్తిన నేపథ్యంలో పరీక్షల్లో అక్రమాల కట్టడికి ఉద్దేశించిన చట్టాన్ని కేంద్రప్రభుత్వం నోటిఫై చేసింది. వాస్తవానికి ప్రభుత్వ పరీక్షల చట్టం-2024కి రాష్ట్రపతి ద్రౌపదీ ముర్ము నాలుగు నెలల కిందటే ఆమోదముద్ర వేసినా.. కేంద్రం తాజాగా చట్ట నిబంధనలను నోటిఫై చేసింది. నిన్నటి నుంచే ఈ చట్టం అమల్లోకి వచ్చింది. దీని ప్రకారం పోటీ పరీక్షల్లో అక్రమాలు పాల్పడితే గరిష్టంగా పదేండ్ల వరకు జైలు శిక్ష విధిస్తారు. అలాగే రూ.కోటి వరకు జరిమానా వేస్తారు.
నెట్‌, యూజీసీ పేపర్‌ లీకుల నేపథ్యంలో ఈ చట్టాన్ని నోటిఫై చేయడం ప్రాధాన్యత సంతరించుకుంది. చట్టాన్ని ఎప్పుడు అమలు చేస్తారని కేంద్ర విద్యామంత్రి ధర్మేంద్ర ప్రధాన్‌ని ప్రతిపక్షాలు ప్రశ్నించిన మరుసటి రోజే దీనిపై నోటిఫికేషన్‌ వెలువడింది. పబ్లిక్‌ ఎగ్జామినేషన్స్‌ బిల్లు-2024ను ఫిబ్రవరి 6న లోక్‌సభ ఆమోదించింది. 9న రాజ్యసభలో ఆమోదం పొందింది. అదే నెల 12న రాష్ట్రపతి ఆమోదముద్ర వేశారు. యూపీఎస్సీ, స్టాఫ్‌ సెలెక్షన్‌ కమిషన్‌, రైల్వేస్‌, బ్యాంకింగ్‌ రిక్రూట్‌మెంట్‌ ఎగ్జామ్స్‌, ఎన్టీఏ నిర్వహించే పరీక్షల్లో అక్రమాలను నిరోధించేందుకు ఈ చట్టాన్ని తీసుకొచ్చారు.