బిష్ణోయ్‌ గ్యాంగ్‌ పేరుతో మరోసారి సల్మాన్‌కు బెదిరింపులు

బాలీవుడ్‌ నటుడు సల్మాన్‌ఖాన్‌కు గ్యాంగ్‌స్టర్‌ లారెన్స్‌ బిష్ణోయ్‌ మనుషుల పేరుతో మరోసారి బెదిరింపులు వచ్చాయి. సల్మాన్‌ ప్రాణాలతో ఉండాలంటే ఆయన రూ. 5 కోట్లు చెల్లించాలని లేదంటే బిష్ణోయ్‌ మందిరంలో క్షమాపణలు చెప్పాలని ముంబయి ట్రాఫిక్‌ కంట్రోల్‌ రూమ్‌కు ఎస్‌ఎంఎస్‌ వచ్చింది. ఆ మెసేజ్‌ పంపిన వ్యక్తి తనకు తాను బిష్ణోయ్‌ సోదరుడిగా పేర్కొన్నారు. తమ గ్యాంగ్‌ ఇంకా క్రియాశీలకంగానే ఉన్నదని, తమ మాట వినకుంటే సల్మాన్‌ను చంపేస్తామని బెదిరించారు.

ఇటీవల ఝార్ఖండ్‌కు చెందిన ఓ కూరగాయల వ్యాపారి ఇదే తరహాలో రూ. 5 కోట్లు డిమాండ్‌ చేయగా పోలీసులు అతడిని అరెస్టు చేశారు. ఓ గుర్తు తెలియని వ్యక్తి కూడా రూ. 2 కోట్లు డిమాండ్‌ చేస్తూ సల్మాన్‌కు బెదిరింపులు పంపాడు. పోలీసులు అతని కోసం గాలిస్తున్నారు.