అత్తాపూర్‌ పిల్లర్‌ నంబర్ 150 దగ్గరికి రా.. బంగ్లాదేశ్ యువతి వ్యభిచారం గుట్టు రట్టు
హైదరాబాద్‌, చాంద్రాయణగుట్టలోని ముస్లిం దంపతులు బంగ్లాదేశ్ యువతితో కొంత కాలంగా వ్యభిచారం చేయిస్తున్నారు.
హైదరాబాద్‌, చాంద్రాయణగుట్టలోని ముస్లిం దంపతులు బంగ్లాదేశ్ యువతితో కొంత కాలంగా వ్యభిచారం చేయిస్తున్నారు. తాజాగా ఆ గుట్టు రట్టయింది. అసలు బంగ్లాదేశ్ యువతి భారత్‌కు ఎలా వచ్చింది?. పాతబస్తీలో ఉంటున్న ముస్లిం దంపతులతో ఆమెకు పరిచయం ఎలా ఏర్పడింది? వాళ్లను ఎలా కలిసింది?. గుట్టు చప్పుడు కాకుండా జరుగుతున్న వ్యభిచారం ఒక్కసారిగా ఎలా బయటపడింది?. ఇదంతా తెలియాలంటే మనం ఫ్లాష్‌ బ్యాక్‌లోకి వెళ్లాల్సిందే.
మ్యాటర్‌లోకి వెళ్తే.. షేక్‌ సోనియా(27), మహ్మద్‌ సల్మాన్‌(24) దంపతులు పాతబస్తీ చాంద్రాయణగుట్ట ఘాజిమిల్లత్‌ కాలనీలో నివసిస్తున్నారు. బట్టల షాపులో పనిచేసే మహ్మద్‌ సల్మాన్‌.. షేక్‌ సోనియాను ప్రేమించి పెళ్లి చేసుకున్నాడు. సోనియా తల్లి బంగ్లాదేశీ, తండ్రి భారత వాసి. అలా షేక్‌ సోనియాకు కోల్‌కతా నగరంతో మంచి సంబంధాలు ఉన్నాయి. బంగ్లాదేశ్, మయన్మార్‌ దేశస్థులు మాట్లాడుకోవడానికి ప్రత్యేకంగా ఒక యాప్‌ ఉంది. ఈ యాప్‌లో షేక్‌ సోనియా తరచూ చాటింగ్‌ చేస్తుండేది. ఇదే క్రమంలో బంగ్లాదేశ్‌లోని రాయ్‌పూర్‌కు చెందిన స్రిస్టీ అక్తర్(22) సోనియాకు పరిచయమైంది.
రోజులు గడుస్తున్న కొద్దీ సోనియాకు, బంగ్లాదేశ్ యువతి స్రిస్టీ అక్తర్‌కు సాన్నిహిత్యం ఏర్పడింది. హైదరాబాద్‌లో తనకు డబ్బు సంపాదించేందుకు ఉద్యోగం దొరుకుతుందా అని స్రిస్టీ అక్తర్ సోనియాను అడిగింది. ఇళ్లలో పనిచేస్తే నెలకు రూ.10 వేలు వస్తాయి, వ్యభిచారమైతే నెలకు రూ.20 వేలు వస్తాయని షేక్‌ సోనియా చెప్పింది. డబ్బు కోసం ఏ పని చేయడానికైనా సిద్ధమే. కానీ భారత్‌లోకి ఎలా రావాలి అని సోనియాను అడుగుతుంది స్రిస్టీ. ఆ రిస్కు నువ్వే తీసుకోవాలి. ఒకవేళ ఇక్కడికి వస్తే మాత్రం నాకు ఫోన్‌ చేయమని నంబర్ ఇస్తుంది సోనియా.
2 నెలల క్రితం అంటే డిసెంబర్‌లో స్రిస్టీ అక్తర్ ఎలాగోలా బంగ్లాదేశ్ సరిహద్దులు దాటి అక్రమ మార్గంలో కోల్‌కతాకు చేరుకుంది. అక్కడి నుంచి రైలులో నేరుగా సికింద్రాబాద్‌కు వచ్చి షేక్‌ సోనియాకు ఫోన్‌ చేసింది. దంపతులు వెళ్లి యువతిని చాంద్రాయణగుట్టలోని తమ ఇంటికి తీసుకొచ్చారు. ఆమెతో వ్యభిచారం చేయించడం మొదలు పెట్టారు. కస్టమర్ల దగ్గరికి స్రిస్టీ అక్తర్‌ను స్వయంగా షేక్‌ సోనియా తీసుకెళ్లి మళ్లీ తిరిగి తీసుకొచ్చేది. సోనియా ఫోన్‌ ఆ సమయంలో స్రిస్టీ అక్తర్ వద్దే ఉండేది. శుక్రవారం షేక్‌ సోనియా పక్కింటికి వెళ్లింది. ఆ సమయంలో ఫోన్‌ రావడంతో స్రిస్టీ అక్తర్ ఎత్తి మాట్లాడింది. అత్తాపూర్‌ పిల్లర్‌ నంబరు 150 దగ్గరికి రావాలని అవతలి వ్యక్తి చెప్పడంతో ఆమె ఆటో ఎక్కి అక్కడికి వెళ్లింది.
కాసేపటికే ఇంటికి వచ్చిన షేక్‌ సోనియా.. తన ఫోన్‌ అక్కడే పడి ఉండడం, స్రిస్టీ అక్తర్ కనిపించకపోవడంతో అనుమానపడింది. కాల్‌ లిస్ట్‌లోని లాస్ట్‌ నంబరుకు డయల్‌ చేసింది. స్రిస్టీ అత్తాపూర్‌కు వస్తోందని చెప్పడంతో సోనియా దంపతులు ఆమెను వెంబడించారు. అత్తాపూర్‌లో స్రిస్టీ అక్తర్‌ను పట్టుకున్నారు. తమకు చెప్పకుండా ఎందుకు వచ్చావని అడగడంతో వారి మధ్య గొడవ జరిగింది.
సోనియా చేతిలోని ఫోన్‌ లాక్కొని 100కి కాల్‌ చేసింది స్రిస్టీ అక్తర్. దీంతో అత్తాపూర్‌ పోలీసులు అక్కడికి వచ్చారు. విషయం తెలుసుకొని చాంద్రాయణగుట్ట పోలీసులకు నిందితులను అప్పగించారు. సోనియా దంపతులతో పాటు బంగ్లాదేశ్ యువతి స్రిస్టీ అక్తర్‌పై పోలీసులు కేసు నమోదు చేసి దర్యాప్తు మొదలుపెట్టారు. పోలీసుల దర్యాప్తులో కొత్త ట్విస్టు బయటపడింది. స్రిస్టీ అక్తర్‌కు ఆల్‌రెడీ పెళ్లయింది. ఆమె భర్త పేరు ఆసిఫ్‌ఖాన్‌. ఇద్దరు పిల్లలు కూడా ఉన్నారు. ఆసిఫ్‌ఖాన్‌ మేస్త్రీ పనిచేయడంతో డబ్బు సరిపోక అక్రమ మార్గంలో దేశ సరిహద్దులు దాటి వ్యభిచార వృత్తిలోకి వచ్చిందని పోలీసులు తెలిపారు.