“ఉనికి”

ఎన్నోసంవత్సరాలనుండి

ఆ కొండ

అలాగే నిలబడివుంది

అలాగని కాలానికి కొలమానమూకాదు ,

తెలివితేటలకూ

చిహ్నమూ కాదు.

కదలక మెదలక స్తబ్దంగా గడ్డకట్టిన

దు:ఖపు బిందువులా

దాని ఉనికి.

1

ఎందుకలా ఇన్ని యుగాలుగా నిరీక్షిస్తున్నాయో, తదేకంగా ఎటువైపు చూస్తున్నాయో ,

అక్కడే ఎందుకలా ఉండిపోయాయో

2

అసలు రూపాలనేవి అంతరంగాల్ని ప్రతిబింబించే రూపాలేనా

ఆత్మను ఆవిష్కరించే రూపాలేనా

వినవు మాట్లాడవు కదలవు మెదలవు

జడంగా నిశ్చలంగా ఎంతకీ బోధపడని రూపాలు

3

ఏ అర్థమూలేని ఉనికి ,

ఎంత ఉన్నతశిఖరమైనా దాని అస్తిత్వమూ

ఎప్పుడూ ప్రశ్నే!

4

అలా మిగలకపోవడంకోసమే మనిషి ప్రయత్నమంతా !

అక్షరాల కోసం వెతుకులాట ,

నిరంతర సంభాషణ ,

కొండలాకాక

నిత్యం కదులుతూ ఉండటం

వస్తుంటాం పోతుంటాం ఎంతో కొంత మిగలాలి

భుజాలకెత్తుకున్న బరువుల్లోంచి కొంచెమైన దించాలి

మోస్తున్న బరువుకంటే, వీస్తున్నబతుకు హాయినిచ్చేట్లు నడవాలి

5

జీవితం గడ్డకట్టిన కొండగా మిగలక పోవడమే

నిజమైన ఉనికి

కొండకూ మనిషికి తేడా తెలియాలి కదా

- యాకూబ్