ఉప్పొంగే అమ్మాయిలు

అమ్మాయిలు గాలులతో తయారవుతారు

తడబడకుండా వీచడమే గాలుల ఆనందం

తమను నిష్కారణంగా అడ్డుకుంటే ఆ గాలులు ఒప్పుకోవు

అమ్మాయిలు పూలతో తయారవుతారు

పరిమళాలు వెదజల్లడమే ఆ పూల ఉత్సాహం

తమను నిర్దయగా నలిపిపారేస్తే ఆ పూలు ఒప్పుకోవు

అమ్మాయిలు పక్షులతో తయారవుతారు

లెక్కలేకుండా స్వేచ్చగా ఎగరడమే ఆ పక్షుల అద్భుతం

తమ రెక్కలు కత్తిరిస్తే ఆ పక్షులు ఒప్పుకోవు

అమ్మాయిలు పర్వతాలతో తయారవుతారు

ఎల్లపుడూ తలలెత్తి నిలబడడమే ఆ పర్వతాల ఆహ్లాదం

తల వంచి జీవించమంటే ఆ పర్వతాలు ఎప్పటికీ ఒప్పుకోవు

అమ్మాయిలు సూర్యగోళంతో తయారవుతారు

అన్ని వేళలా వెలుగులీనడమే ఆ సూర్యగోళాల ఉత్తేజం

మేఘాల ముసుగులు కప్పితే ఆ సూర్యగోళాలు ఒప్పుకోవు

రెండేళ్ల క్రితం సెప్టెంబర్ 25 శనివారం ఉదయం మరణించిన కవి, రచయిత, స్త్రీవాద ఉద్యమకారిణి, సామాజిక శాస్త్రవేత్త కమలా భాసిన్ (1946-2021) కు కన్నీటి నివాళులతో...)

మూలం :కమలా భాసిన్

తెలుగు: ఎన్ వేణుగోపాల్