ప్రపంచాన్ని నడిపించేది
ఓ నమ్మకం
అది లోపించిన నాడు
జరిగి పోదా
ఒకరిని ఒకరు అమ్మకం!
మావటి వాడెంత ఓ ఉండ
ఏనుగు ఓ కొండ
అయినా అంకుశంతో
పొడిచి పొడిచి
తాననుకున్న మార్గాన్ని నడిపించు
వళ్ళు మండి తొండంతో
తిప్పి తిప్పి కొడితే
పిండి పిండయిపోడా
తననేమి చేయదని ఓ నమ్మకం
లక్షలు కోట్లు డబ్బు తీసుకుని
తెల్ల కాగితంపై
ఓ సంతకం చేసి ఇస్తే
కళ్ళ కద్దుకుని దాచుకుంటున్నావే
కాలం గడచే కొలది
కాల దోషం పట్టింది పొమ్మంటే
కాగితం నాలుక గీచుకోను కూడా
పనికి రాదు
అయినా
తన వంశం పరువు కోసం
బిడ్డల పరపతి కోసం
వడ్డీతో కూడా కడతాడని ఓ నమ్మకం!
పడుచు భార్యను వదిలేసి
పతి బ్రతుకు తెరువుకై
పరదేశం వెళితే
సంవత్సరాల తరబడి రాకుంటే
గాడి తప్పను ఓ క్షణం పట్టదు
అయినా!
చంద్రుని వెన్నెల సోనల కోసం
చకోర పక్షిలా ఎదురు చూస్తుందని
అతని ప్రగాఢ నమ్మకం!
ప్రపంచాన్ని నడిపించేది
ఓ నమ్మకం
అది లోపించిన నాడు
జరిగి పోదా అమ్మకం
- జంజం కోదండ రామయ్య
(జమ్మిపాలెం ,నెల్లూరు)