ఇప్పుడు కావాలో విజయం

రాశులు పోసిన ధన రథాలపై

దర్జాగా కూర్చుని

జీవితాన్ని పరుగులు పెట్టించే ధనోన్మాదులకు

రథచక్రాల కింద నలిగిపోతున్న చలిచీమల్లాంటి

బడుగు బతుకుల చప్పుళ్ళు వినబడవు

ఆ చలిచీమలకు కావాలో బతుకు విజయం

ఆకలితో పేగులు లుంగచుట్టుకుపోతూ

కడుపుల్ని చేత పట్టుకుని

చెత్తకుండీల్లో విసిరేసిన

ఎంగిలాకుల మెతుకుల్ని ఆబగా తినే అభాగ్యులు

ఆ అభాగ్యులకు కావాలో అన్నవిజయం

కష్టాలగుట్టు పెదవి దాటనీకుండా

పొద్దస్తమానం రక్తం ధారపోసి

సాధించుకున్నఇల్లాళ్ళ కూలి డబ్బుల్ని

నోటకరచుకుపోయే గద్దలు

తాగుబోతు భర్తలు

ఆ ఇల్లాళ్ళకి కావాలో తెగింపు విజయం

పుస్తకాల బరువులో బాల్యాన్ని కుక్కి

ఆటపాటలంటే ఏమిటో తెలీకుండా

కేరింతల సంతోషాన్ని దూరం చేసే

చదువుల చెరసాలల్లో మగ్గిపోతూ పసిపిల్లలు

ఆ పసిపిల్లలకు కావాలో బాల్యవిజయం

చదువుకోవాలనే కాంక్షని

అలవికానిపనుల కోసం వెచ్చించి

మూల్యం చెల్లించే అసంఖ్యాక బాలకార్మికులు

ఆ బాలకార్మికులకు కావాలో విముక్తివిజయం

అవసరం తీరాక

ఆశల్ని తగలేసే నాయకుల్ని నమ్ముకుని

ఐదేళ్ళ భవితవ్యాన్నీ ఆకాంక్షల్నీ

మద్యానికీ డబ్బుకీ పంచి

ఓటుని స్వయంకృతంగా

చిదిమేసుకునే కోట్ల ప్రజానీకం

ఆ ప్రజలకు కావాలో ఆశావిజయం

డబ్బుకి తప్ప జీవితాలకు విలువలేదని

రాత్రికిరాత్రి రూపాయల కోటల్లో పాగాలు వేసి

నిజాయితీ కంటికి కునుకు దూరం చేస్తున్నారు

అక్రమార్జనా పరులు

ఆ నిజాయితీకి కావాలో చిరునవ్వు విజయం

 -కొంపెల్ల కామేశ్వరరావు