ఇంతేరా ఈ జీవితం ( కవిత)

గాలి బుడగ రా ఈ జీవితం

తెలుసుకోరా ఈ జీవిత మర్మం

ఏడుస్తూ పుడుతూ ఏడిపించి వెళ్ళేదే దేవుడిచ్చిన జీవితం

ఈ రెండు ఏడుపుల మధ్యదే

నీ కోసం నీదనే జీవితం

ఇంతేరా .... జీవితం

ఈ మాత్రం దానికి

ఎందుకురా సంబురం

నవ్వుతూ , నవ్విస్తూ బ్రతికేయ్ జీవితాంతం

" బ్రహ్మచర్యం "

అంతా మధుర స్మృతుల హరివిల్లు

" గృహస్థ " వ్యవస్థ

అంతా కుటుంబంతో

సంతోషాల పొదరిల్లు

"వానప్రస్థం" అంతా

బాల్య గృహస్థల తీపిగురుతుల నెమరువేతలు

"సన్యాసం" అంతా పరమాత్మ

పిలుపు కోసం ఎదురు చూపులు  

ఇంతేరా .... జీవితం ,  

ఈ మాత్రం దానికి

ఎందుకురా సంబురం

నవ్వుతూ , నవ్విస్తూ బ్రతికేయ్ జీవితాంతం

రోజూ ఏదో... ఇంకేదో సాధించాలని ఉరుకులు పరుగులు

దానికోసం నిత్యం అలుపెరగని పోరాటాలు , ఆయాసాలు

మనిషిగా మానవత్వం లేని మృగానికన్నా హేయమైన పనులు

చివరి రోజుకు వట్టి చేతుల తిరుగు ప్రయాణాలు

ఇంతేరా .... జీవితం ,  

ఈ మాత్రం దానికి

ఎందుకురా సంబురం

నవ్వుతూ , నవ్విస్తూ బ్రతికేయ్ జీవితాంతం

గాలి బుడగ లాంటి జీవితం కోసం

జీవమే లేని మర యంత్రంగా మారి

బంధాలు , అనుబంధాలు , బంధుత్వాలు మరచి

విలువలు లేని మనిషిగా మారి

ఆనందం , ఆత్మీయతలకు అర్ధమే తెలియకుండా

చిరు గాలి సవ్వడికి ఆవిరై పోయేదేరా

ఈ జీవితం  

ఇంతేరా .... జీవితం ,  

ఈ మాత్రం దానికి ఎందుకురా సంబురం

నవ్వుతూ , నవ్విస్తూ బ్రతికేయ్ జీవితాంతం

ఎవరు నీ తలరాతను రాసేది...  

ఎవరు నీకు మార్గం చూపేది....

దివ్యత్తాన్ని నమ్ముతూ ...  

రాసుకో నీ రాతను

జీవిస్తూ మరణించకు

నీకంటూ , నీదంటూ

చివరిగా నీకు మిగిలేది

కాదు..... నువ్వు బ్రతికిన సంవత్సరాలది

అవును ..... ఆస్వాదించిన

మధుర అనుభవాలది....  

ఇంతేరా .... జీవితం.....!!

- భీమా శ్రీనివాసరావు