జగన్ తప్పక హోదా సాధిస్తాడు " జేసీ దివాకర్ రెడ్డి

వైఎస్ జగన్ అంటే అంతెత్తున లేచే జేసీ దివాకర్ రెడ్డి రూటు మార్చారు. ఏపీ ముఖ్యమంత్రిగా జగన్ బాధ్యతలు చేపట్టిన తర్వాత జేసీ బాణీలో మార్పు వచ్చింది. జగన్ పై ఆయన ప్రశంసల జల్లు కురిపిస్తున్నారు.

జగన్‌ను ఒక విషయంలో మెచ్చుకోవాలి.. ఆయన ప్రత్యేక హోదా విషయంలో మొదటి నుంచి ఒకే విధానానికి కట్టుబడి ఉన్నారని.. ఢిల్లీలో ప్రధాని మోడీతో మాట్లాడిన తీరు చూస్తుంటే భవిష్యత్‌లో కచ్చితంగా జగన్‌ ప్రత్యేక హోదా సాధిస్తాడనే నమ్మకం ఉందని జేసీ అన్నారు. ఆయన మాటతీరు అద్భుతమని జేసీ కితాబిచ్చారు.

తాను ఏనాడు జగన్‌ను ద్వేషించలేదని జేసీ చెప్పారు. కేవలం రాజకీయపరమైన విమర్శలు మాత్రమే జగన్‌పై చేశానని.. తనకు ఆయన మీద ద్వేషం లేదని అన్నారు. జగన్ చాలా నిజాయితీగా వ్యవహరిస్తున్నారని, ఆయనకు నా అభినందనలు అంటూ జేసీ వ్యాఖ్యానించారు.