మొహమాటంతో మునిగిపోయానంటున్న మహేష్‌బాబు

మహేష్‌బాబుకు కాస్త మొహమాటం ఎక్కువే అన్నది చాలా మందికి తెలిసిన విషయమే. ఈ మొహమాటం కారణంగా మహేష్‌బాబు తాను నష్టపోతున్న విషయాన్ని గుర్తించాడు. ఒక దశలో మహేష్‌ బాబు మొహమాటం… కొందరు దర్శకులకు బంపర్‌ ఆఫర్లకు కారణమైంది. అదే సమయంలో మహేష్‌ బాబుపై భారీ డిజాస్టర్ల బండలు పడ్డాయి. దీంతో ఇప్పుడు రూట్‌ మార్చాడు మహేష్.

ఇది వరకు ఒక డైరెక్టర్ తనకు ఒక హిట్ ఇస్తే చాలు మహేష్‌బాబు వెంటనే ఆ డైరెక్టర్‌కు మరో చాన్స్ ఇచ్చేవాడు. కథ కూడా వినకుండానే డైరెక్టర్‌కు ఆఫర్ ఇచ్చేవాడు. ఇలా చేసే మూడు అతిపెద్ద డిజాస్టర్లను మూటకట్టుకున్నాడు. దూకుడుతో భారీ హిట్‌ ఇచ్చాడన్న ఉద్దేశంతో శీనువైట్లకు మరో చాన్స్ ఇవ్వగా…. ఆగడు అంటూ దూకుడును అటుఇటు చేసి రుద్దేశాడు దర్శకుడు. ఆ ఆగడు… థియేటర్లలో ఎక్కువ కాలం ఆగలేదు.

సీతమ్మ వాకిట్లో సిరిమల్లె చెట్టు అంటూ మంచి సినిమా ఇచ్చిన శ్రీకాంత్ అడ్డాలకు ఇదే తరహాలో మొహమాటంతో కథ వినకుండానే చాన్స్ ఇచ్చాడు. బ్రహ్మాత్సవం బయటకు వచ్చింది. ఆ సినిమాను చివరకు ఆర్టీసీ బస్సుల్లో ప్రయాణికులు ఉచితంగా కూడా భరించలేనంత డిజాస్టర్‌ అయిపోయింది. తమిళ డైరెక్టర్ మురగదాసు విషయంలోనూ ఇదే జరిగింది.

మంచి డైరెక్టర్ కదా అని మొహమాటన పడిన మహేష్‌ బాబు… స్పైడర్ చిత్రానికి ఓకే చేశాడు. ఫలితం ఏమైందో అందరికీ తెలుసు. దీంతో గుడ్డిగా డైరెక్టర్లను నమ్మేస్తే కొంప కొల్లేరవడం ఖాయమని నిర్ధారించుకున్న మహేష్ బాబు… ఇప్పుడు ఎంత పెద్ద డైరెక్టర్ వచ్చినా సరే ముందు కథ చెప్పాల్సిందే అంటున్నారట. కథ నచ్చిన తర్వాత డైరెక్టర్‌ గురించి ఆలోచిస్తా అని మొహమాటం లేకుండా చెప్పేస్తున్నాడు.