అక్టోబర్ 6 నుంచి ప్రభాస్ కొత్త సినిమా

ప్రభాస్ ను జనాలు చూసి చాలా రోజులైంది. ఎప్పుడు ఎక్కడుంటాడో కూడా ఎవరూ చెప్పలేకపోతున్నారు. కేవలం ఓ అరడజను మంది అత్యంత సన్నిహితులకు మాత్రమే ప్రభాస్ రోజువారీ కార్యక్రమాలు తెలుసు. అలా కొన్ని రోజులుగా అజ్ఞానంలో ఉన్న ప్రభాస్ ఒక్కసారిగా ఇటలీలో ప్రత్యక్షమయ్యాడు. అది కూడా సరికొత్త లుక్ లో కనిపించడం విశేషం.

మొన్నటివరకు సాహో షూటింగ్ లో ఉన్న ప్రభాస్ ఇప్పుడు మరో సినిమాకు షిఫ్ట్ అయ్యాడు. రీసెంట్ గా రాధాకృష్ణ కుమార్ దర్శకత్వంలో సినిమాకు ప్రభాస్ కొబ్బరికాయ కొట్టిన సంగతి తెలిసిందే. ప్రస్తుతం ఆ సినిమా పనిమీదే ఇటలీకి వెళ్లాడు. 6వ తేదీ నుంచి ఈ సినిమా షూటింగ్ ఇటలీలో ప్రారంభం అవుతుంది.

ఈ మూవీ కోసం మీసాలు తీసేసి క్యూట్ గా తయారయ్యాడు ప్రభాస్. పైగా 70 ఏళ్ల కిందటి ప్రేమకథతో తెరకెక్కుతున్న సినిమా కావడంతో డ్రెస్సింగ్ స్టయిల్, హెయిర్ స్టయిల్ కూడా మార్చేశాడు. యూవీ క్రియేషన్స్ బ్యానర్ పై తెరకెక్కనున్న ఈ సినిమాలో పూజా హెగ్డే హీరోయిన్ గా నటించబోతోంది. ఇటలీలో ఈ షెడ్యూల్ తో పాటు సాహో షూటింగ్ కూడా కొనసాగుతుంది.