నాకో కోడ‌లు కావాలి!

ఎంత చెప్పినా కొడుకు పెళ్లి చేసుకోవ‌టం లేద‌ని విసుగెత్తిపోయిన ఓ అమెరికా పెద్ద‌మ‌నిషి కోడ‌లికోసం పేప‌రులో ఫుల్‌పేజి ప్ర‌క‌ట‌న‌ ఇచ్చేశాడు.

సాల్ట్ లేక్ సిటీలో ఉంటున్న బిజినెస్ మ్యాన్ బేర‌న్ బ్రూక్స్ (48) హ‌ఠాత్తుగా త‌న ఫొటోతో ఫుల్‌పేజి ప్ర‌క‌ట‌న పేప‌రులో క‌నిపించేస‌రికి షాక్ తిన్నాడు. అందులో బేర‌న్ అనే ఈ వ్య‌క్తికి అర్జంటుగా భార్య కాద‌గిన అమ్మాయి కావాల‌ని, ఆమె వెంట‌నే పిల్ల‌ల‌ను క‌నాల్సి ఉంటుంద‌ని, ఇంటి ప‌ట్టునే ఉండాల‌ని ఉంది. బేర‌న్ వ‌య‌సు, ఎత్తు, అత‌ని రాజ‌కీయ అభిప్రాయాలు వెల్ల‌డిస్తూ, త‌గిన అర్హ‌త‌లు ఉన్న అమ్మాయిలు శ‌నివారం కోర్ డ్యూలేన్‌లోని ఓ రిసార్టులో జ‌ర‌గ‌నున్న ఇంట‌ర్వ్యుకి హాజ‌రు కావాల‌ని ఉంది. ఈ పేప‌రు ప్ర‌క‌ట‌న గురించి త‌న‌కు తెలియ‌ద‌ని, నిజంగా చాలా సిగ్గ‌నిపించింద‌ని బేర‌న్ అంటున్నాడు. ఇప్పుడు తండ్రిని ఏమ‌న్నా ప్ర‌యోజ‌నం ఏముంటుంద‌ని, ఆయ‌న తాను చేసేది అంతా క‌రెక్ట్ అనే అభిప్రాయంతో ఉంటాడ‌ని అత‌ను పేర్కొన్నాడు. త‌న తండ్రి అనారోగ్యంతో బాధ‌ప‌డుతున్నందున ఆయ‌న‌కు ఒక మ‌నుమ‌డు కావాల‌నే ఆత్రుత పెరిగిపోయింద‌ని అన్నాడు. అయితే ప్ర‌క‌ట‌న ఇచ్చిన ఆర్థుర్ (78) అనే ఆ పెద్ద మ‌నిషి ఆదివారం మ‌ధ్యాహ్నం వ‌ర‌కు తాను ఈ విష‌యం గురించి ఏమీ మాట్లాడ‌బోన‌ని చెబుతున్నాడు. అప్ప‌టిక‌ల్లా త‌న‌కు కాబోయే కోడ‌లి ఎంపిక జ‌రిగిపోతుంద‌ని ఆర్థుర్ భావిస్తున్నాడు.