తెలంగాణ బిడ్డ గొంగడి త్రిషకు సీఎం అభినందనలు

మహిళల అండర్ 19 టీ20 వరల్డ్ కప్ చరిత్రలోనే మొట్టమొదటి సెంచరీ సాధించిన తెలంగాణ బిడ్డ గొంగడి త్రిషకు సీఎం రేవంత్‌రెడ్డి అభినందనలు తెలిపారు. భద్రాద్రి - కొత్తగూడెం జిల్లా, భద్రాచలంకు చెందిన త్రిష.. భారత జట్టు విజయంలో కీలకపాత్ర పోషించడం మనందరికీ గర్వకారణమని ముఖ్యమంత్రి ఎక్స్ వేదికగా పేర్కొన్నారు.

త్రిష లాంటి మరింత మంది మెరికల్లాంటి క్రీడాకారులను తయారు చేసేందుకు మన ప్రజా ప్రభుత్వం కృషి చేస్తోందని తెలిపారు. అద్భుత నైపుణ్యం ప్రదర్శించిన మన క్రీడాకారులకు తగిన గుర్తింపునిస్తూనే.. మరింత మంది తెలంగాణ బిడ్డలు ప్రపంచస్థాయిలో రాణించాలనే లక్ష్యంతో యంగ్ ఇండియా స్పోర్ట్స్ వర్సిటీ ఏర్పాటుకు సంకల్పించామని సీఎం పేర్కొన్నారు. స్కాట్ లాండ్ మ్యాచ్‌లో త్రిష ఫోర్లు, సిక్సర్లతో రెచ్చిపోయింది. 52 బంతుల్లో నాలుగు సిక్సర్లు, 12 ఫోర్లతో సెంచరీనమోదు చేసింది.