కాంగ్రెస్ మరో లీకు.. గొర్రెల పథకంలో అవినీతి

తెలంగాణలో కాంగ్రెస్ అధికారంలోకి వచ్చిన తర్వాత, గత బీఆర్ఎస్ హయాంలో జరిగిన వ్యవహారాాలపై ఓ కన్నేసింది. అవినీతి, అక్రమాలు జరిగాయంటూ తీవ్ర విమర్శలు చేస్తోంది. మేడిగడ్డకు ఆల్రడీ మరమ్మతులు జరుగుతున్నాయి. టెలిఫోన్ ట్యాపింగ్ కుంభకోణంలో తీవ్ర వాదోపవాదాలు మొదలయ్యాయి. తాజాగా గొర్రెల పంపిణీ పథకంపై కాంగ్రెస్ ఘాటు విమర్శలు చేస్తోంది. ఈ పథకంలో 700 కోట్ల రూపాయల అవినీతి జరిగిందని ఆరోపిస్తోంది. తాజాగా ఏసీపీ అభికారులు కూడా ఇదే విషయాన్ని ధృవీకరించినట్టు చెబుతున్నారు. కొంతమంది అధికారుల్ని కూడా ఏసీబీ అరెస్ట్ చేయడంతో ఈ వ్యవహారం మరింత రచ్చగా మారింది.

బీఆర్ఎస్ హయాంలో పశుగణాభివృద్ధి సంస్థకు సీఈవోగా, రాష్ట్ర గొర్రెలు, మేకల అభివృద్ధి సమాఖ్యకు ఎండీగా పనిచేసిన రాంచందర్‌ నాయక్, తలసాని శ్రీనివాస్‌యాదవ్‌ మాజీ ఓఎస్డీ గుండమరాజు కల్యాణ్‌కుమార్‌ను ఏసీబీ అధికారులు తాజాగా అరెస్ట్‌ చేశారు. ఈ కేసులో ఇప్పటికే 10మంది నిందితులను గుర్తించగా, ఆరుగురిని అరెస్టు చేశారు. ఏకంగా సీఈవో స్థాయి అధికారి, మాజీ మంత్రి మాజీ ఓఎస్డీ అరెస్ట్ కావడంతో ఈ వ్యవహారం సంచలనంగా మారింది. మరికొందరు పెద్దల పాత్ర కూడా ఈ కుంభకోణంలో ఉందనే ఆరోపణలు వినపడుతున్నాయి.

2015లో బీఆర్ఎస్ ప్రభుత్వం గొర్రెల పంపిణీ పథకాన్ని ప్రారంభించింది. రాష్ట్రవ్యాప్తంగా రూ.4వేల కోట్ల విలువైన గొర్రెలను పంపిణీ చేసినట్లు గణాంకాలున్నాయి. ఈ క్రమంలో లబ్ధిదారుల పేరు చెప్పి కొన్ని ప్రాంతాల్లో నిధులు స్వాహా చేసినట్టు ఆరోపణలున్నాయి. గొర్రెల అమ్మకం దారులకు డబ్బులు చెల్లించినట్టు దొంగ బిల్లులు సృష్టించి ఆ నిధుల్ని దారి మళ్లించారని అంటున్నారు. ఈ కేసులో ఇప్పుడు విచారణ వేగవంతమైంది. ఉద్దేశపూర్వకంగానే కొంతమంది అధికారుల్ని ఇబ్బంది పెడుతున్నారని బీఆర్ఎస్ నుంచి ఆరోపణలు వినపడుతున్నాయి. ఇచ్చిన హామీలు అమలు చేయడం చేతగాక, గత ప్రభుత్వంపై విమర్శలు చేస్తున్నారని అంటున్నారు. అందుకే ఇలా కుంభకోణాలంటూ లీకులిస్తున్నారని మండిపడుతున్నారు బీఆర్ఎస్ నేతలు.