ఐసీసీ క్రికెటర్‌ ఆఫ్‌ ది ఇయర్‌గా బుమ్రా

భారత స్టార్‌ పేసర్‌ జస్‌ప్రీత్‌ బుమ్రాను ప్రతిష్టాత్మక ఐసీసీ అవార్డు వరించింది. ఐసీసీ క్రికెటర్‌ ఆఫ్‌ ది ఇయర్‌ (2024) అవార్డుకు బుమ్రా ఎంపికయ్యాడు. సర్‌ గ్యారిఫీల్డ్‌ సోబర్స్‌ పేరిట ఇచ్చే ఈ పురస్కారం కోసం బుమ్రాతో పాటు జో రూట్‌, హ్యారీ బ్రూక్‌ (ఇంగ్లాండ్‌), ట్రావిస్‌ హెడ్‌ (ఆస్ట్రేలియా) పోటీపడ్డారు. చివరికి భారత పేసర్‌ ఎంపికయ్యాడు. బుమ్రా ఐసీసీ టెస్ట్‌ జట్టులోనూ చోటు సంపాదించుకున్నాడు. 2024 టెస్ట్‌ క్రికెటర్‌ ఆఫ్‌ ది ఇయర్‌గానూ నిలిచాడు. గత ఏడాది టెస్టుల్లో బుమ్రా అద్భుతమైన బౌలింగ్‌తో ఆకట్టుకున్నాడు. 13 మ్యాచ్‌ల్లో 71 వికెట్లు పడగొట్టాడు. ఈ క్రమంలోనే 2024లో సుదీర్ఘ ఫార్మాట్‌లో అత్యధిక వికెట్లు తీసిన బౌలర్‌గా రికార్డు సృష్టించాడు.

తొలి భారత పేసర్‌గా రికార్డు

ఈ క్రమంలోనే ఐసీసీ క్రికెటర్‌ ఆఫ్‌ ది ఇయర్‌ అవార్డు గెలిచిన తొలి భారత పేసర్‌గా రికార్డు సృష్టించాడు. ఓవరాల్‌గా ఐదో భారత క్రికెటర్‌గా నిలిచాడు. అంతకుముందు రాహుల్‌ ద్రావిడ్‌ (2004), సచిన్‌ టెండుల్కర్‌ (2010), రవిచంద్రన్‌ అశ్విన్‌ (2016), విరాట్‌ కోహ్లీ (2017, 2018) ఈ పురస్కారానికి ఎంపికయ్యారు.