యూట్యూబ్‌ ట్రెండింగ్‌ 'మట్కా'ట్రైలర్‌

వరుణ్‌ తేజ్‌ హీరోగా కరుణ కుమార్‌ డైరెక్షన్‌లో తెరకెక్కిన మూవీ 'మట్కా'. మీనాక్షి చౌదరి హీరోయిన్‌. శనివారం విడుదలైన ఈ సినిమా ట్రైలర్‌ యూట్యూబ్‌ ట్రెండింగ్‌లో మొదటిస్థానంలో దూసుకెళ్తున్నది. దీనిపై హీరో వరుణ్‌ తేజ్‌ స్పందిస్తూ.. 'మా ట్రైలర్‌పై విశేష స్పందన కనబరిచిన ప్రేక్షకులకు ధన్యవాదాలు. మీకు ఈ సినిమాను అందించేందుకు ఎంతగానో ప్రయత్నిస్తున్నాం. నవంబర్‌ 14న థియేటర్లలో కలుద్దాం' అని పేర్కొన్నారు.

ఈ ట్రైలర్‌పై డైరెక్టర్‌ సందీప్‌ రెడ్డి వంగా స్పందిస్తూ.. 'ఇంటెన్సిఫైడ్‌ ట్రైలర్‌. వరుణ్‌.. నువ్వు చాలా పవర్‌ఫుల్‌గా కనిపిస్తున్నావు. నటుడిగా నీలోని మరో కోణాన్ని చూసేందుకు ఆసక్తిగా ఎదురుచూస్తున్నా. కంగ్రాట్స్‌ కరుణ కుమార్‌. టీమ్‌ అందరికీ ఆల్‌ ది బెస్ట్‌' అని అన్నారు.

'వరుణ్‌ బాబు.. కిల్లర్‌ ట్రైలర్‌.. నువ్వు అద్భుతంగా ఉన్నావు. తన అతి పెద్ద గ్యాంబ్లింగ్‌తో తప్పకుండా అందరినీ అలరిస్తాడని నమ్ముతున్నా. మూవీ చూసేందుకు ఎదురుచూస్తున్నా' అని సాయిధరమ్‌ (దుర్గా) తేజ్‌ పోస్ట్‌ పెట్టారు.

డైరెక్టర్‌ కరుణ కుమార్‌ 'పలాస 1978', 'శ్రీదేవి సోడా సెంటర్‌' సినిమాలతో టాలీవుడ్‌ ప్రేక్షకులకు వినూత్న అనుభూతిని అందించారు. ఆయన దర్శకత్వంలో తెరకెక్కిన మూవీనే 'మట్కా'. పీరియాడిక్‌ డ్రామాగా సిద్ధమైన ఈ సినిమాలో వరుణ్‌ తేజ్‌ నాలుగు భిన్నమైన గెటప్పుల్లో కనువిందు చేయనున్నారు. రతన్‌ ఖత్రి అనే గ్యాంబ్లర్‌ స్టోరీని ఆధారంగా చేసుకొని ఫిక్షనల్‌ కథ సిద్ధం చేశామని డైరెక్టర్‌ తెలిపారు. వాసు అనే వ్యక్తి ప్రయాణమే ఈ కథ. 1958లో చిన్నతనంలోనే శరణార్థిగా బర్మా నుంచి వైజాగ్‌కు వస్తాడు. అక్కడి నుంచి ఒక్కోమెట్టు ఎక్కుతూ 'మట్కా' కింగ్‌లా ఎలా మారాడు అన్నది కథ అని వరుణ్‌ ట్రైలర్‌ విడుదల కార్యక్రమంలో చెప్పారు. ట్రైలర్‌లో వరుణ్‌ చెప్పిన డైలాగ్స్‌ బాగున్నాయి. మూవీ మేకింగ్‌, నటీ నటుల గెటప్‌లన్నీ చూస్తుంటే అప్పటి అనుభూతి కలిగేలా జాగ్రత్తలు తీసుకున్నట్లు కనిపిస్తున్నది.