Sundaram Master | సుందరం మాస్టర్ వచ్చేస్తున్నాడు..!
Sundaram Master - వైవా హర్ష ప్రధాన పాత్ర పోషించిన సినిమా సుందరం మాస్టర్. ఈ సినిమాకు తాజాగా రిలీజ్ డేట్ ఫిక్స్ చేశారు.
హర్ష చెముడు, దివ్య శ్రీపాద ప్రధాన పాత్రల్లో తెరకెక్కిన సినిమా సుందరం మాస్టర్. ఆర్‌.టి. టీమ్ వ‌ర్క్స్‌ బ్యానర్ పై హీరో రవితేజ నిర్మించిన సినిమా ఇది. క‌ళ్యాణ్ సంతోష్ దర్శకుడు. సుందరం అనే టీచర్ చుట్టూ నడిచే కథే ఇది.
తను గవర్నమెంట్ టీచర్. సోషల్ స్టడీస్ బోధిస్తుంటాడు. అయితే మిర్యాల మెట్ట అనే మారుమూల పల్లెలో ఇంగ్లీష్ టీచర్‌గా వెళ్లాల్సిన ప‌రిస్థితి వ‌స్తుంది. అందులో అన్నీ వ‌య‌సుల‌వారు ఇంగ్లీష్ నేర్చుకోవ‌టానికి విద్యార్థులుగా వ‌స్తారు. మ‌రి సుందరం మాస్టర్ వారికెలా ఇంగ్లీష్‌ను బోధించాడు అనే విషయాన్ని ఈ సినిమాలో ఎంటర్టైనింగ్గా చెప్పారు.
సినిమాకు సంబంధించి ఇప్పటికే టీజర్ రిలీజ్ చేశారు. అప్పట్లో రిలీజ్ డేట్ కూడా ప్రకటించారు. అయితే ప్రచారానికి టైమ్ లేకపోవడం, రవితేజ కూడా అందుబాటులో లేకపోవడంతో వాయిదా వేశారు. అలా వాయిదా పడిన సుందరం మాస్టర్ సినిమాను ఫిబ్రవరి 16న విడుదల చేయబోతున్నారు.
న్యూ ఇయర్ సందర్భంగా ‘సుందరం మాస్టర్’ అటెండెన్స్ ప్రోమోను మేకర్స్ రిలీజ్ చేశారు. ‘సుందరం మాస్టర్’ మూవీ ఎంత ఎంటర్టైనింగ్గా ఉండనుందనే విషయాన్ని ఈ ప్రోమోలో మరోసారి ఎలివేట్ చేశారు. ఇప్పటివరకు కమెడియన్‌గా మెప్పించిన హర్ష చెముడు.. ‘సుందరం మాస్టర్’ మూవీలో తొలిసారి ప్రధాన పాత్రలో ఎలా మెప్పిస్తాడో చూడాలి. శ్రీచరణ్ పాకాల ఈ సినిమాకు సంగీత దర్శకుడు.