Ramcharan Sukumar | రంగస్థలం కాంబో రిపీట్
Ramcharan Sukumar - రంగస్థలం కాంబినేషన్ మళ్లీ సెట్ అయింది. ఈ ఏడాదిలోనే చరణ్-సుక్కూ సెట్స్ పైకి వెళ్లబోతున్నారు.
వెండితెరపై అద్భుతమైన విజ‌యాన్ని సొంతం చేసుకున్న రంగస్థలం కాంబినేషన్ రిపీట్ అయింది. మూవీ ల‌వ‌ర్స్ ఎప్పుడెప్పుడా అని ఎదురుచూస్తున్న సినిమా ప్రక‌ట‌న రానే వ‌చ్చింది. గ్లోబ‌ల్ స్టార్ రామ్ చరణ్ హీరోగా, సుకుమార్ ద‌ర్శక‌త్వంలో మైత్రీ మూవీస్ మేక‌ర్స్ సంస్థ ఓ భారీ చిత్రాన్ని ప్రకటించింది. సుకుమార్ రైటింగ్స్ బ్యానర్ సహ-నిర్మాతగా వ్యవహరించనుంది.
ఈ సినిమా కోసం మరో అద్భుతమైన కథను సిద్ధం చేశాడు సుకుమార్. ఈ విషయాన్ని దాదాపు రెండేళ్ల కిందటే రాజమౌళి వెల్లడించాడు. సుకుమార్ తో రామ్ చరణ్ చేయబోయే సినిమా కథ తనకు తెలుసని, ఆ సినిమాలో ఇంటర్వెల్ బ్లాక్ అదిరిపోతుందని కూడా హింట్ ఇచ్చాడు. అప్పట్నుంచి వెయిట్ చేస్తున్న ఈ ప్రాజెక్ట్ ను ఇన్నాళ్లకు ప్రకటించారు.
ఆర్ఆర్ఆర్ త‌ర్వాత గ్లోబ‌ల్ స్టార్ అయ్యాడు రామ్‌చ‌ర‌ణ్‌. ఇటు పుష్ప సినిమాతో పాన్ ఇండియా డైరక్టర్ అయ్యాడు సుకుమార్. వీరిద్దరి కాంబినేష‌న్‌లో తెర‌కెక్కనున్న ఈ సినిమా మీద దేశవ్యాప్తంగా ఎక్స్ పెక్టేష‌న్స్ ఉన్నాయి. వాట‌న్నిటినీ అందుకునేలా చిత్రాన్ని తెర‌కెక్కించ‌నున్నారు సుకుమార్.
సినిమా షూటింగ్ ను ఈ ఏడాదిలోనే మొద‌లుపెడ‌తారు. వచ్చే ఏడాది చివరి త్రైమాసికంలో సినిమాను విడుదల చేయాలనేది టార్గెట్. సుకుమార్ సినిమాకు రెగ్యులర్ గా పనిచేసే దేవిశ్రీ ప్రసాద్, ఈ సినిమాకు కూడా సంగీతం అందించబోతున్నాడు. హీరోయిన్ తో పాటు, టెక్నీషియన్స్ వివరాల్ని త్వరలోనే వెల్లడిస్తారు.