ప్రభాస్‌ అభిమానులకు గుడ్‌ న్యూస్‌ – ‘సలార్‌’ రిలీజ్‌ డేట్‌ ఫిక్స్‌

ప్రభాస్‌ తాజా సినిమా ‘సలార్‌’ విడుదల కోసం ఎదురుచూస్తున్న అభిమానులకు శుభవార్త. ప్రశాంత్‌ నీల్‌ దర్శకత్వంలో రూపొందుతున్న ఈ చిత్రం రిలీజ్‌ డేట్‌ను చిత్ర బృందం అధికారికంగా వెల్లడించింది. డిసెంబర్‌ 22న ఈ చిత్రాన్ని విడుదల చేయనున్నట్టు పేర్కొంటూ ట్వీట్‌ చేసింది. తద్వారా క్రిస్మస్, సంక్రాంతి కలెక్షన్లను గంపగుత్తగా కొల్లగొట్టడానికి చిత్ర బృందం గట్టి ప్లానే వేసినట్టు దీనినిబట్టి అర్థమవుతోంది. ఇప్పటికే ఈ చిత్రం విడుదల తేదీ వాయిదా వేయడంతో నిరుత్సాహంలో ఉన్న అభిమానులు తాజా ప్రకటనతో సంబరపడుతున్నారు.

మొదట ఈ సినిమాను సెప్టెంబర్‌ 28న విడుదల చేయాలని ఈ చిత్ర బృందం భావించినా.. కొన్ని కారణాల వల్ల రిలీజ్‌ను వాయిదా వేస్తున్నట్టు ప్రకటించింది. ప్యాన్‌ ఇండియా స్టార్‌గా మారిన ప్రభాస్‌కి ఇటీవల కాలంలో సరైన విజయాలేవీ లేని నేపథ్యంలో ఎన్నో అంచనాలతో రూపొందుతున్న ‘సలార్‌’పై అభిమానులు ఎన్నో ఆశలు పెట్టుకున్నారు. ‘కేజీఎఫ్‌’ చిత్రాన్ని రూపొందించిన ప్రశాంత్‌ నీల్‌ దర్శకత్వంలో ఈ చిత్రం రూపొందుతున్న నేపథ్యంలో సినీ అభిమానులందరిలోనూ ఈ చిత్రంపై ఎన్నో అంచనాలు నెలకొన్నాయి. ఈ చిత్రం విడుదల కోసం దాదాపు సినీ అభిమానులందరూ ఎప్పుడెప్పుడా అని ఎదురుచూస్తున్నారంటే అతిశయోక్తి కాదు.

ఇప్పటికే విడుదలైన ఈ చిత్రం టీజర్‌ విశేషంగా అలరించి సినిమాపై అంచనాలు పెంచింది. హీరోని ఎలివేట్‌ చేస్తూ ప్రముఖ నటుడు టీనూ ఆనంద్‌ చెప్పిన ’సింపుల్‌ ఇంగ్లిష్‌’ డైలాగ్స్, యాక్షన్‌ విజువల్స్‌ ప్రేక్షకులతో అదరహో అనిపించాయి. 24 గంటల్లోపే 83 మిలియన్ల వ్యూస్‌ను ఈ టీజర్‌ దక్కించుకోవడం విశేషం. పవర్‌ఫుల్‌ యాక్షన్‌ ఎంటర్‌టైనర్‌గా రూపొందుతున్న ఈ సినిమాలో శ్రుతి హాసన్‌ హీరోయిన్‌గా నటిస్తోంది. జగపతిబాబు, ఈశ్వరీరావు, శ్రియారెడ్డి తదితరులు ఈ చిత్రంలో కీలక పాత్రలు పోషిస్తున్నారు.