Pushpa 2: పుష్ప-2 షూటింగ్.. ఈసారి మరో కొత్త తేదీ

ఇప్పటికే లెక్కలేనన్ని సార్లు వాయిదా పడింది పుష్ప-2 సినిమా రెగ్యులర్ షూటింగ్. గతంలో మేకర్స్ ప్రకటించిన స్టేట్ మెంట్స్ ప్రకారం చూసుకుంటే, ఈ సినిమా డిసెంబర్ లో రిలీజ్ అవ్వాలి. కానీ ఇప్పటివరకు సెట్స్ పైకి కూడా రాలేదు పుష్ప-2. 

ప్రతి నెల ఈ సినిమా రెగ్యులర్ షూటింగ్ పై ఓ అప్ డేట్ రావడం, మళ్లీ వాయిదా పడడం కామన్ అయిపోయింది. అక్టోబర్ లో కూడా సినిమా షూటింగ్ కు డేట్స్ ఫిక్స్ చేశారు. కానీ కుదరలేదు. ఇప్పుడు నవంబర్ వచ్చింది. తాజాగా మరో డేట్ తెరపైకొచ్చింది.

పుష్ప-2 సినిమాను నవంబర్ 9 నుంచి సెట్స్ పైకి తీసుకొస్తారట. ప్రస్తుతం సోషల్ మీడియాలో జోరుగా జరుగుతున్న ప్రచారం ఇది. మరి ఇది ఏ మేరకు నిజమౌతుందో ఆ రోజు వస్తే కానీ చెప్పలేం. 

రకరకాల కారణాల వల్ల పుష్ప-2 రెగ్యులర్ షూటింగ్ దాదాపు ఏడాది ఆలస్యమైంది. దీంతో ఈ సినిమా విడుదల కూడా ఏడాది లేట్ అయినట్టే. ఈ ఏడాది డిసెంబర్ లో థియేటర్లలోకి రావాల్సిన ఈ సినిమా, వచ్చే ఏడాది డిసెంబర్ లో వస్తుందేమో. 

అల్లు అర్జున్, రష్మిక హీరోహీరోయిన్లుగా నటిస్తున్న ఈ ప్రాజెక్టుకు సుకుమార్ దర్శకుడు. దేవిశ్రీప్రసాద్ సంగీతం అందిస్తున్నాడు. మైత్రీ మూవీ మేకర్స్ బ్యానర్ పై వస్తోంది పుష్ప-2.