Selfish: రెండో సినిమా మొదలుపెట్టిన దిల్ రాజు వారసుడు
Selfish Movie: దిల్ రాజు కాంపౌండ్ హీరో ఆశిష్, తన రెండో సినిమా స్టార్ట్ చేశాడు. ఈ సినిమా పేరు సెల్ఫిష్. సుకుమార్ ఇందులో భాగస్వామి.
దిల్ రాజు కాంపౌండ్ నుంచి నటవారసుడు తెరపైకొచ్చిన సంగతి తెలిసిందే. దిల్ రాజు సోదరుడి కొడుకు ఆశిష్ హీరోగా మారాడు. తొలి ప్రయత్నంగా రౌడీ బాయ్స్ అనే సినిమా చేశాడు. ఇప్పుడు మలి ప్రయత్నంగా సెల్ఫిష్ అనే ప్రయత్నం చేస్తున్నాడు. రౌడీ బాయ్స్ ను సూపర్ హిట్ చేయడానికి దిల్ రాజు తెగ కష్టపడ్డాడు. కానీ అతడి మంత్రాంగం, మేనేజ్ మెంట్ పనిచేయలేదు. దీంతో సెల్ఫిష్ పై బజ్ తగ్గింది. అయితే యూనిట్ మాత్రం ఇప్పట్నుంచే ఈ సినిమాను లేపే ప్రయత్నాన్ని గట్టిగా చేస్తోంది.
ఈ సినిమా కోసం సుకుమార్ ను రంగంలోకి దించాడు దిల్ రాజు. అప్పుడెప్పుడో వచ్చిన ఆర్య-2 తర్వాత మళ్లీ సుకుమార్, దిల్ రాజు బ్యానర్ లో కనిపించలేదు. ఇప్పుడు ఆషిశ్ కోసం మరోసారి ఈ కాంపౌండ్ లోకి ఎంటరయ్యాడు.
సుకుమార్ శిష్యుడు విశాల్ కాశీని దర్శకుడిగా పరిచయం చేస్తూ శ్రీ వెంకటేశ్వర క్రియేషన్స్ సంస్థ ఈ సినిమా నిర్మిస్తోంది. సుకుమార్ రైటింగ్స్ సంస్థ సహ-నిర్మాతగా వ్యవహరిస్తుంది.
ఈ చిత్రం రెగ్యులర్ షూటింగ్ తాజాగా హైదరాబాద్‌లోని ధూల్‌పేట్‌లో ప్రారంభమైంది. సినిమాలో హీరో ఆశిష్ పూర్తి మాస్‌ లుక్‌లో స్టెలిష్‌గా కనిపిస్తాడు. వైవిధ్యమైన కథతో తెరకెక్కుతున్న యూత్‌ఫుల్ లవ్‌స్టోరీ ఇది.