Gangs of Godavari | ఆ బూతులు కట్ చేశారు

గ్యాంగ్స్ ఆఫ్ గోదావరి సినిమా ట్రయిలర్ వచ్చింది. విశ్వక్ సేన్ హీరో గా నటించిన ఈ సినిమా ట్రయిలర్ లో బూతుల్ని విచ్చలవిడిగా వాడారు. యూట్యూబ్ లో రిలీజ్ చేసిన ట్రయిలర్ కాబట్టి బూతులన్నీ అలానే వదిలేశారు. అప్పటికీ మొహమాటం కొద్దీ కొన్నింటినీ కట్ చేశారు.

కానీ అవన్నీ సినిమాలో నడవవు కదా. ఎందుకంటే, అక్కడ సెన్సార్ సిస్టమ్ ఉంటుంది. ఇప్పుడదే జరిగింది. గ్యాంగ్స్ ఆఫ్ గోదావరి సినిమాలోని బూతులన్నింటినీ సెన్సార్ కట్ చేసింది. కొన్ని చోట్ల సన్నివేశాలు కట్ చేయగా, చాలా చోట్ల మ్యూట్ వేశారు.

విశ్వక్ సేన్ హీరోగా నటించిన ఈ సినిమాలో నేహా శెట్టి, అంజలి హీరోయిన్లుగా నటించారు. సినిమాలో తన పాత్ర కూడా బూతులు మాట్లాడుతుందని అంజలి స్వయంగా ప్రకటించిన సంగతి తెలిసిందే. తాజా సమాచారం ప్రకారం, వాటిని కూడా సెన్సారోళ్లు కట్ చేసి పడేశారు.

గోదావరి నేపథ్యంలో సాగే ఈ యాక్షన్ డ్రామాలో రత్న పాత్రను సహజంగా చూపించేందుకు ఇలా బూతుల్ని యధేచ్ఛంగా వాడారు. సినిమాలో వాటిని తొలిగించారు. అయితే ఈమధ్య కొన్ని సినిమాల్లో కొన్ని బూతుల్ని అలానే ఉంచేస్తున్నారు. అవసరమైతే ఎ-సర్టిఫికేట్ తీసుకుంటున్నారు.

కానీ గ్యాంగ్స్ ఆఫ్ గోదావరి సినిమాకు మాత్రం అలాంటి పదాల్ని కట్ చేయాలని మేకర్స్ కూడా ఫిక్స్ అయ్యారు. కృష్ణచైతన్య డైరక్ట్ చేసిన ఈ సినిమాకు యువన్ శంకర్ రాజా సంగీతం అందించాడు.