ఇది హీరో అరుణ్ విజయ్ 'ఆక్రోశం'

మొన్నటికి మొన్న ఏనుగు సినిమాతో థియేటర్లలోకి వచ్చాడు హీరో అరుణ్ విజయ్. ఆల్రెడీ టాలీవుడ్ లో ఉన్న భారీ కాంపిటిషన్ మధ్య ఏనుగు చితికిపోయింది. మంచి కంటెంట్ తో వచ్చినప్పటికీ, ఈ సినిమాను తెలుగు ప్రేక్షకులు పట్టించుకోలేదు. అలా ఏనుగు హవా ముగిసింది. ఇప్పుడు మరో సినిమాతో రెడీ అయ్యాడు అరుణ్ విజయ్. ఈ సారి ఆక్రోశం పేరిట మరో తమిళ సినిమాను తెలుగులో డబ్బింగ్ చేసి వదిలాడు.

విఘ్నేశ్వర ఎంటర్‌ టైన్మెంట్‌ బ్యానర్ పై అరుణ్‌ విజయ్‌ హీరోగా, కుమారవేలన్ దర్శకత్వంలో తెరకెక్కిన సినిమా సినం. ఈ సినిమాను తెలుగులో ఆక్రోశం పేరిట విడుదల చేస్తున్నారు నిర్మాత సతీష్ కుమార్.

ఆక్రోశం సినిమాలో విజయ్ సరసన పాలక్ లల్వానీ హీరోయిన్ గా నటిస్తోంది. ఇదొక రివెంజ్ డ్రామాతో కూడిన యాక్షన్ థ్రిల్లర్. ఇందులో పవర్ ఫుల్ పోలీసాఫీసర్ గా కనిపించబోతున్నాడు విజయ్. ఈ సినిమాకు షబీర్‌ తబరే ఆలం సంగీతం అందిస్తున్నాడు. అన్ని కార్యక్రమాలు పూర్తి చేసుకొని త్వరలో ఈ చిత్రాన్ని విడుదల చేయడానికి సన్నాహాలు చేస్తున్నారు.

సాహో సినిమా నుంచి అరుణ్ విజయ్ నటించిన మూవీస్ ఒక్కొక్కటిగా తెలుగులోకి వస్తున్నాయి. అయితే సూర్య, కార్తి, విశాల్ లాంటి నటులకు ఉన్నంత క్రేజ్, అరుణ్ విజయ్ కు రావడం లేదు. అలాంటి క్రేజ్, మార్కెట్ కోసమే ప్రయత్నిస్తున్నాడు అరుణ్ విజయ్.