నందమూరి ఫ్యామిలీ నుంచి మరో నటుడు ఎంట్రీ

నందమూరి హరికృష్ణ మనవడు, జానకిరామ్‌ కుమారుడు తారక రామారావు హీరోగా వైవీఎస్‌ చౌదరి డైరెక్షన్‌లో కొత్త మూవీ తెరకెక్కనున్న సంగతి తెలిసిందే. 'న్యూ టాలెంట్‌ రోర్స్‌' పతాకంపై ఆయన సతీమణి గీత ఈ సినిమాను నిర్మిస్తున్నారు. ఈ మూవీకి కీరవాణి సంగీతాన్ని అందిస్తున్నారు. ఈ సినిమాకు సంబంధించి పలు విషయాలు పంచుకోవడానికి వైవీఎస్‌ చౌదరి మీడియా సమావేశాన్ని నిర్వహించారు. అందులో కొత్త హీరో తారక రామారావును పరిచయం చేశారు. ఈ కార్యక్రమానికి దర్శకేంద్రుడు రాఘవేంద్రరావు, ప్రముఖ నిర్మాత అశ్వినీదత్‌ ముఖ్యఅతిథులుగా హాజరయ్యారు.

ఈ సందర్భంగా వైవీఎస్‌ చౌదరి మాట్లాడుతూ.. సీనియర్‌ ఎన్టీఆర్‌పై ఆసక్తితోనే తాను సినీ ఇండస్ట్రికి వచ్చినట్లు తెలిపారు. ఆయన ప్రోత్సాహం వల్లనే ఇప్పుడు ఈ స్థానంలో ఉన్నాను. ఎన్టీఆర్‌ తన మునిమనవడు రూపంలో వచ్చారు. ఎన్టీఆర్‌ అనే పేరు మూడు అక్షరాల తారకమంత్రం. ఆరడుగుల రూపం ఈ తారక రామారావుది. ఈ హీరోకు కుటుంబం నుంచి పూర్తి ఆశిస్సులు అందించాలని కోరుకుంటున్నాను. నేను అందరి హీరోల అభిమానులను ఆప్యాయంగా పలకరిస్తాను. నేను ఇప్పటివరకు పరిచయం చేసిన హీరోలందరినీ ఫ్యాన్స్‌ ఆదరించారు. అలాగే ఈ తారక రామారావును కూడా ఆదరిస్తారని ఆశిస్తున్నానని అన్నారు.