'అహింస' పూర్తి చేసిన తేజ

దగ్గుబాటి వంశం నుంచి మరో నటవారసుడు వస్తున్న సంగతి తెలిసిందే. దగ్గుబాటి సురేష్ బాబు చిన్న కొడుకు, రానా తమ్ముడు దగ్గుబాటి అభిరామ్ హీరోగా సినిమా వస్తోంది. తేజ దర్శకత్వంలో వస్తున్న అహింస అనే సినిమాతో అభిరామ్ హీరోగా తెరపైకి రాబోతున్నాడు. ఇప్పుడీ సినిమా షూటింగ్ పూర్తి చేసుకుంది.

ఎంతోమంది హీరోల్ని తెరకు పరిచయం చేసిన ఘనత తేజకు దక్కుతుంది. తేజ, ఉదయ్ కిరణ్, నవదీప్.. ఇలా చాలామంది తెరకు పరిచయం చేశాడు. ఇప్పుడు అభిరామ్ ను ఇంట్రడ్యూస్ చేస్తున్నాడు. అన్ని కమర్షియల్ హంగులతో, తేజ మార్క్ కథతో వస్తున్న సినిమా ఇది. ఫుల్ యాక్షన్ కూడా ఉంటుందట.

ఆనంది ఆర్ట్‌ క్రియేషన్స్‌ బ్యానర్ పై కిరణ్‌ ఈ చిత్రాన్ని నిర్మిస్తున్నారు. గీతిక తివారీ హీరోయిన్ గా నటిస్తోంది. గతంలో తేజ సినిమాతో పాపులర్ అయిన సదా, ఈ సినిమాలో కీలక పాత్ర పోషిస్తోంది. కమల్ కామరాజు మరో కీలక పాత్రలో కనిపించనున్నాడు.

ఈ సినిమాకు మరో ప్రత్యేకత కూడా ఉంది. లాంగ్ గ్యాప్ తర్వాత ఆర్పీ పట్నాయక్ ఈ సినిమాతో సంగీత దర్శకుడిగా రీఎంట్రీ ఇస్తున్నాడు. గతంలో తేజ, ఆర్పీ పట్నాయక్ కాంబోలో వచ్చిన ప్రతి సినిమా మ్యూజికల్ హిట్టయిన సంగతి తెలిసిందే. నువ్వు నేను సినిమా తర్వాత తేజ, ఆనంది ఆర్ట్స్ క్రియేషన్స్, ఆర్‌పి పట్నాయక్ కలిసి చేస్తున్న సినిమా ఇదే.