కూర్చున్న లోకేష్, పడుకున్న పవన్.. ఎవరు గొప్ప..?

చంద్రబాబు అరెస్ట్ తర్వాత నారా లోకేష్ రోడ్డుపై కూర్చుని నిరసన తెలిపారు.

పోలీసులు అడ్డుకోవడంతో ఏకంగా రోడ్డుపై పడుకొని నిరసన తెలిపారు పవన్ కల్యాణ్.

వీరిద్దరిలో ఎవరు గొప్ప అంటూ ఇప్పుడు సోషల్ మీడియాలో పోటీ మొదలైంది. చంద్రబాబు అరెస్ట్ తర్వాత లోకేష్, పవన్ విన్యాసాలపై వైసీపీ జోకులు పేలుస్తోంది.

విశ్వాసం చూపించిన పవన్..!

అసలు కొడుకు లోకేష్ పై నమ్మకం లేకే చంద్రబాబు, పవన్ పై ఆధారపడ్డారని వైసీపీ విమర్శిస్తోంది. ఈ క్రమంలో పవన్ కల్యాణ్, చంద్రబాబుకి దత్తపుత్రుడంటూ స్వయానా సీఎం జగన్ పదే పదే సెటైర్లు పేలుస్తుంటారు కూడా. ఈరోజు ఆ విషయం పూర్తిగా రుజువైంది అంటున్నారు వైసీపీ నేతలు. చంద్రబాబు కోసం ఏకంగా నడిరోడ్డుపై పడుకుని నిరసన తెలిపిన పవన్, తన విశ్వాసం నిరూపించుకున్నారంటూ రెచ్చగొడుతున్నారు.

తండ్రిని అరెస్ట్ చేస్తే కన్న కొడుకు రోడ్డుపై కూర్చుని కాసేపు హడావిడి చేశారని, దత్త పుత్రుడు మాత్రం దత్త తండ్రికోసం ఏకంగా హైవేపై పడుకుని నానా రభస చేశారని అంటున్నారు వైసీపీ నేతలు. వారిద్దర్నీ కంపేర్ చేస్తూ సోషల్ మీడియా హోరెత్తిపోతోంది. ఒకరకంగా లోకేష్ చేసిన పనికంటే, పవన్ చేసిన ఫీట్లు బాగా హైలైట్ అయ్యాయి. ఆయన వీడియోలే వైరల్ గా మారాయి. ఇక ఈరోజు ఇంకెన్ని చిత్రాలు చూడాలో అంటున్నారు. మొత్తమ్మీద హడావిడిగా సినిమా షూటింగ్ లు క్యాన్సిల్ చేసుకుని చంద్రబాబు కోసం విజయవాడ బయలుదేరిన పవన్.. ముందు ఫ్లైట్ లో, అది కుదరదంటే కారులో, అదీ కుదరకపోయే సరికి కాలినడకన.. ఇలా రకరకాల ఫీట్లు చేసి టీడీపీకి మరింత దగ్గరయ్యారని కౌంటర్లిస్తున్నారు.