పది రోజులు ముందే మేజర్ ప్రీ రిలీజ్ ఫిల్మ్ స్క్రీనింగ్..!

తెలుగు చిత్ర పరిశ్రమ సరికొత్త పుంతలు తొక్కుతోంది. ఏ భాషలో అయినా సినిమా నిర్మాణం మొదలు పెట్టిన తర్వాత ఆడియో విడుదల పేరిట ప్రమోషన్స్ మొదలు పెట్టేవారు. కానీ తెలుగులోనే మొదటిసారిగా ప్రీ రిలీజ్ ఈవెంట్లు నిర్వహించడం ప్రారంభించడంతో దేశంలోని మిగిలిన సినీ ఇండస్ట్రీలు కూడా ఇదే పంథాను అనుసరించడం ప్రారంభించాయి. ఇప్పుడు ప్రమోషన్లలో సరికొత్త ప్రయోగానికి టాలీవుడ్ మరో శ్రీకారం చుట్టింది.

యంగ్ హీరో అడివి శేష్ ప్రధానపాత్రలో నటించిన మేజర్ సినిమాను రిలీజ్ డేట్ కి 10 రోజులు ముందుగానే దేశంలోని పలు ప్రాంతాల్లోని 9 థియేటర్లలో ప్రదర్శించనున్నారు. మేజర్ సినిమాను 26/11 ముంబై పేలుళ్ల సమయంలో ఉగ్రవాదులను ఎదుర్కొనే క్రమంలో సాహసం ప్రదర్శించి అమరుడైన మేజర్ సందీప్ ఉన్నికృష్ణన్ జీవితం ఆధారంగా నిర్మించారు. ఈ సినిమాను ప్రముఖ హీరో మహేష్ బాబు సోనీ పిక్చర్స్ వారితో కలిసి సంయుక్తంగా నిర్మించారు.

ఈ సినిమా జూన్ 3వ తేదీన తెలుగు, హిందీ, మలయాళ భాషల్లో పాన్ ఇండియా స్థాయిలో విడుదల కానుంది. అయితే ఈ మూవీ మేకర్స్ ప్రమోషన్లలో భాగంగా రిలీజ్ కు పది రోజుల ముందే ఈ సినిమాను దేశంలోని పలు ప్రాంతాల్లో ప్రదర్శించాలని నిర్ణయించారు. దేశవ్యాప్తంగా హైదరాబాద్(ఏఎమ్బీ సినిమాస్ ) సహా 9 కేంద్రాల్లో 24వ తేదీ నుంచి రోజుకొక కేంద్రంలో ఈ సినిమాను ప్రదర్శించనున్నారు.

హైదరాబాద్ లో జూన్ 2వ తేదీన ఏఎమ్బీలో ప్రదర్శించనున్నారు. ప్రీ రిలీజ్ ఫిల్మ్ స్క్రీనింగ్ పేరిట ఒక సినిమాను రిలీజ్ డేట్ కి పది రోజుల ముందే విడుదల చేయడం దేశంలోనే ఇదే మొదటిసారి. మేజర్ సినిమా నుంచి విడుదలైన టీజర్, ట్రైలర్ ఇప్పటికే ఆకట్టుకోవడంతో ఈ సినిమా విడుదల కోసం ప్రేక్షకులు ఆసక్తిగా ఎదురు చూస్తున్నారు.