శ్రీవిష్ణు సినిమా మళ్లీ వాయిదా.. కొత్త డేట్ ఎప్పుడంటే..

నటుడు శ్రీవిష్ణు విభిన్న కథలను ఎంచుకుంటూ ముందుకు సాగుతున్నాడు. కామెడీ జానర్ లో అతడు ఎంచుకొనే సబ్జెక్ట్ లు ప్రేక్షకులను విపరీతంగా ఆకట్టుకుంటున్నాయి. ఇక లాక్ డౌన్ టైంలో ఓటీటీ ప్రేక్షకులు అతడి చిత్రాలు తెగ చూసేశారు. తిప్పరా మీసం, బ్రోచేవారెవరురా, మెంటల్ మదిలో, రాజరాజచోర వంటి సినిమాలు శ్రీవిష్ణుకు మంచి పేరుతీసుకొచ్చాయి. దీంతో మాంచి ఊపుమీద ఉన్నాడు ఈ యువ హీరో.

ఇక శ్రీవిష్ణు కథానాయకుడిగా వారాహి వారు భళా తందనాన అనే ఓ చిత్రాన్ని తెరకెక్కిస్తున్న విషయం తెలిసిందే. ఈ సినిమాలో కేథరిన్ క‌థానాయికగా నటించింది. బాణం ఫేమ్ చైతన్య దంతలూరి ఈ సినిమాకు దర్శకుడు. రజనీ కొర్రపాటి నిర్మాత. ఇప్పటికే పలుసార్లు భళా తందనాన మూవీ విడుదల వాయిదా పడగా, ఏప్రిల్ 30వ తేదీన ఈ సినిమాను విడుదల చేస్తున్నట్లు కొద్ది రోజుల కిందట మేకర్స్ ప్రకటించారు.

ఆచార్య 29న విడుదల అవుతున్న‌ప్ప‌టికీ రంజాన్ సందర్భంగా మే 3న సెలవు ఉంది కాబట్టి తమకు కలసి వస్తుందని అప్పట్లో మేకర్స్ ప్రకటించారు. కానీ ప్రస్తుతం మార్కెట్ లో కేజీఎఫ్-2 హవా ఇంకా కొనసాగుతుండటం, ఆచార్య సినిమా రెండు తెలుగు రాష్ట్రాల్లో భారీ స్థాయిలో విడుదల కావడంతో వారం తర్వాత తమ చిత్రాన్ని మే 6న విడుదల చేయబోతున్నట్టు మేకర్స్ తాజాగా ప్రకటించారు. వైవిధ్యమైన కథాంశంతో రూపుదిద్దుకున్న భళాతందనాన ట్రైలర్, టీజర్ ప్రేక్షకులను ఆకట్టుకుంది.