రజనీకాంత్ సినిమా వాయిదా

రజనీకాంత్ కొత్త సినిమా వ్యవహారం కరోనాకు ముందు, కరోనా తర్వాత అన్నట్టు తయారైంది. లాక్ డౌన్ ప్రారంభానికి ముందు రజనీకాంత్ సినిమా రిలీజ్ డేట్ ఎనౌన్స్ చేశారు. ఇప్పుడు అన్ లాక్ అవుతున్న టైమ్ లో సినిమా రిలీజ్ ను వాయిదా వేస్తున్నట్టు ప్రకటించారు.

శివ దర్శకత్వంలో అన్నాత్తై అనే సినిమా చేస్తున్నాడు రజనీకాంత్. ఈ సినిమాను వచ్చే ఏడాది సంక్రాంతికి తీసుకొస్తామని నిర్మాణ సంస్థ సన్ పిక్చర్స్ ప్రకటించింది. అయితే ఆ వెంటనే కరోనా వచ్చి లాక్ డౌన్ పడింది. దీంతో తప్పనిసరి పరిస్థితుల మధ్య సినిమాను వాయిదావేస్తున్నట్టు ప్రకటించారు.

సినిమా షూటింగ్ తో పాటు పోస్ట్-ప్రొడక్షన్ పూర్తిచేయాలంటే మరో 6 నెలల టైమ్ పడుతుందట. అందుకే వచ్చే ఏడాది సంక్రాంతికి రావాల్సిన సినిమాను, సమ్మర్ కు వాయిదా వేశారు. అయితే వేసవిలో ఏ నెలలో వస్తుందనే విషయాన్ని మాత్రం ఇంకా చెప్పలేదు.

కీర్తి సురేష్, నయనతార హీరోయిన్లుగా నటిస్తున్న ఈ సినిమాలో మరో కీలక పాత్రలో ఖుష్బూ కనిపించనుంది. తెలుగులో ఈ సినిమాను అన్నయ్య పేరుతో విడుదల చేయడానికి ప్లాన్ చేస్తున్నారు.